News and events

کۆبونەوەی ئامادەکاری بۆ کۆنفرانسی پەیوەندییە گشتییەکان و راگەیاندن لە سایەی پەیوەندیی دیجیتاڵیدا

posted Mar 25, 2021, 1:43 AM by Barham Khalid Ahmed

ئەنجومەنی باشکردنی ئاستی خوێندنی کۆلێژەکانی راگەیاندن لە عێراق بە هاوکاری زانکۆی سلێمانی و سەندیکای رۆژنامەنوسانی عێراق کۆنفرانسێکی زانستی لە زانکۆی سلێمانی ئەنجامدەدەن بە ناونیشانی پەیوەندییە گشتییەکان و راگەیاندن لە سایەی پەیوەندیی دیجیتاڵییدا.

رۆژی سێشەممە ٢٣ی ٣ی ٢٠٢١ لە کۆلێژی زانستە مرۆڤایەتییەکانی زانکۆی سلێمانی کۆبونەوەی ئامادەکاری کۆنفرانسەکە ئەنجامدرا بە بەشداری هەریەک لە پرۆفیسۆر د.علی عبدالهادی نوێنەری وەزارەتی خوێندنی باڵای عێراق و پرۆفیسۆر د. محمد جهاد مامۆستای راگەیاندن لە زانکۆی عێراقییە و د. سحر خلیفە سالم مامۆستا لە کۆلیژی راگەیاندنی زانکۆی عێراقییە و د. ئیبتیسام اسماعیل قادر، راگری کۆلێژی زانستە مرۆڤایەتییەکان و د. ئامانج حەسەن، یاریدەدەری راگر و د. کمال جلال، یاریدەدەری راگری کۆلێژی زانستە سیاسییەکان و  سەرۆکی بەشی راگەیاندن و ژمارەیەک لە مامۆستایان.

لە کوبونەوەکەدا گفتوگۆکرا دەربارەی ناونیشان و تەوەرەکانی کۆنفرانس کە بڕیارە لە چەند مانگی داهاتوودا لە زانکۆی سلێمانی ئەنجام بدرێت لە پێناو هەڵسەنگاندنی دۆخی پەیوەندییە گشتییەکان و راگەیاندن لە سایەی پێشکەوتنی کۆمۆنیکەیشنی دیجیتاڵیدا. 



لە رۆژی جلی کوردیدا فێستیڤاڵی خوێندکارانی کۆلێج بەڕێوەچوو

posted Mar 10, 2021, 10:57 AM by Barham Khalid Ahmed   [ updated Mar 10, 2021, 11:01 AM ]

بۆ پیرۆز راگرتنی رۆژی نیشتمانی جلی کوردی، خوێندکارانی کۆلێژی زانستە مرۆڤایەتییەکان فێستیڤاڵێکی تایبەتیان رێکخست کە تێیدا  چەند چالاکییەکی هونەریی ئەنجامدرا.

رۆژی ١٠ی ٣ی ٢٠٢١ بە چاودیری و لەژێر سەرپەرشتی راگرایەتی کۆلێژ و بەهاوکاری  نوێنەرایەتی خوێندکاران، لە چوارچێوەی فێستیڤاڵی خوێندکارانی  کۆلێژی زانستە مرۆڤایەتییەکاندا چەند چالاکییەکی هونەری پێشکەشکران .

سەرەتای چالاکییەکان بە نمایشێکی کەلتوری کوردی دەستیپێکرد لە بەردەم هۆڵی کۆماری کوردستان کە تێیدا چەندین بابەتی کەلەپوری تایبەت بە کورد خرابونەڕوو. پاشان بە وەستانی چەند ساتێک بۆ گیانی شەهیدان و بە مارشی ئەی رەقیب چالاکییەکان دەستیپێکرد. کە تێیدا د. ئیبتیسام ئیسماعیل، راگری کۆلێج و د.ئامانج حەسەن یاریدەدەری راگر و سەرۆک بەشەکان و ژمارەیەکی زۆر لە مامۆستایان و خوێندکاران بە جلوبەرگی کوردییەوە ئامادەیبوون.

دواتر وتاری نوێنەرائیەتی خوێندکاران خوێندرایەوە و تێیدا پیرۆزبایی رۆژی جلی کوردی و گرنگی پاراستنی جلوبەرگی کوردی بۆ دۆزی کورد خرایەڕوو. هەروەها سوپاسی راگرایەتی کۆلێژی کرد لە هاوکاری و پاڵپشتیکردنی ئەو چالاکییانە. دواتر ژمارەیەک لە خوێندکاران بە خوێندنەوەی چەند پارچە هۆنراوەیەک بەشدارییان کرد و  دوو دەقی شانۆیی لەلایەن خوێندکارانی بەشە جیاوازەکانی کۆلێژەوە نمایشکرا کە یەکێکیان تایبەت بوو بە جیهانگیری و ئەویدیکەشیان سەبارەت بە قوربانییەکانی کورد بوو لە سەردەمی داگیرکاریدا. لە کۆتاییدا بە ئاهەنگ و هەڵپەڕکێی کوردی کۆتایی بە چالاکییەکان هات. 





ئەنجومەنی کۆلێج بەشە ناوخۆییەکانی کوڕان و کچانی بەسەرکردەوە

posted Mar 2, 2021, 12:05 PM by Barham Khalid Ahmed

بە مەبەستی لە نزیکەوە ئاگاداربون لە کێشەو داخوازییەکانیان، ئەنجومەنی کۆلێجی زانستە مرۆڤایەتییەکان بە سەرۆکایەتی د.ئامانج حەسەن، یاریدەدەری راگر و بەشێک لە سەرۆکی بەشە زانستییەکانی کۆلێژ بەشە ناوخۆییەکانی کوڕان و کچانیان بەسەرکردووە.

رۆژی دووشەممە ١ی ٣ی ٢٠٢١ ئەنجومەنی کۆلێجی زانستەمرۆڤایەتییەکان بە ئامادەبونی نوێنەری گشتی کۆلێج و بە هەماهەنگی لەگەڵ بەرپرسی بەشەناوخۆییەکانی کوڕان سەردانی بەشە ناخۆییەکانی كه‌می نوێی زانكۆی سلێمانی (كوڕان و كچان)یان کرد بۆ لە نزیکەوە گوێگرتن لە خواست و داواکارییەکانی خوێندکارانی نیشتەجێی بەشە ناوخۆییەکان.

د. ئامانج حەسەن، یاریدەدەری راگر داوای لە خوێندکارانی بەشە ناوخۆییەکان کرد کە بەرپرسانە مامەڵە بکەن و رێنماییەکانی تەندروستی و سەلامەتی و ئارامی رەچاو بکەن لە پێناو رەخساندنی کەشێکی گونجاو بۆ خوێندکاران بە تایبەت لە کاتی تاقیکردنەوەکاندا و هەروەها لە نزیکەوە گوێیان لە خواستەکانی خوێندکاران گرت و بەڵێنی جێبەجێکردنی داواکارییەکانیانی پێدان بە پێی ئەو توانا مرۆیی و مادییەی لە بەردەست زانکۆدایە.
هەروەها به‌ڵێنیشیاندا كه‌ كار له‌سه‌ر كێشه‌ و داواكارییه‌كانی تری خوێندكاران بكه‌ن و داواكارییه‌كانیان بگه‌یه‌نن به‌ لایه‌نی په‌یوه‌ندیدار بۆ ئه‌وه‌ی به‌زوترین كات بۆیان چاره‌سه‌ر بكرێت
وه‌ جه‌ختیشیان له‌سه‌ر ئه‌وه‌ كرده‌وه‌ كه‌ به‌رده‌وام ده‌بن له‌ گه‌یاندنی داواكارییه‌كانی خوێندكاران و چاره‌سه‌ر كردنی كێشه‌كان و هاوكاری كردنی خوێندكاران.

تاوتوێی تێزێکی دکتۆرا سەبارەت بە رۆڵی میدیای نوێ لە پرۆسەی دروستکردنی بڕیاری سیاسیی

posted Feb 28, 2021, 9:51 AM by Barham Khalid Ahmed   [ updated Feb 28, 2021, 11:41 AM ]

لە بەشی راگەیاندنی کۆلێژی زانستە مرۆڤایەتییەکان تاوتوێی تێزی دکتۆرای خوێندکار (بەرهەم خالد احمد) بە ناونیشانی (رۆڵی میدیای نوێ لە پرۆسەی دروستکردنی بڕیاری سیاسی لە هەرێمی کوردستان) توێژینەوەیەکی مەیدانی بوو لەسەر ئاستی پشت بەستنی پەرلەمانتارانی کوردستان بە میدیا کۆمەڵایەتییەکان بەڕێوەچوو.

تاوتوێی تێزەکە لە رۆژی چوارشەممە  بەرواری  ٢٤ی ٢ی ٢٠٢١ لە هۆڵی بابان لە کۆلێژی زانستە مرۆڤایەتییەکان  بەڕێوەچوو. پاش نزیکەی پێنج کاتژمێر گفتوگۆی زانستی لەلایەن ئەندامانی لیژنەی گفتوگۆوە تێزەکە بە کەمێک دەستکاری و بە پلەیەکی زۆر باش پەسەند کرا.

ئەندامانی لیژنەی گفتوگۆ پێکهاتبوون لە بەرێزان:

١- پرۆفیسۆری یاریدەدەر د. ئومێد رفیق فتاح            زانکۆی جیهان                       سەرۆکی لیژنە

 ٢- پرۆفیسۆری یاریدەدەر د. عمر احمد رمضان       زانکۆی سلێمانی                        ئەندام

 ٣- پرۆفیسۆری یاریدەدەر د. پاڤێ جمیل احمد          زانکۆی سلێمانی                         ئەندام

 ٤- پرۆفیسۆری یاریدەدەر د. محمد خضر مولود       زانکۆی صلاح الدین                    ئەندام

 ٥- پرۆفیسۆری یاریدەدەر د. دلێر احمد حمە            زانکۆی پۆلیتەکنیکی هەولێر           ئەندام

 ٦- پرۆفیسۆری یاریدەدەر د. فواد علی احمد            زانکۆی سلێمانی                    ئەندام و سەرپەرشتیار






  



 



توێژینەوەیەی دوو مامۆستای بەشەکانی کۆمەڵناسی و کاری کۆمەڵایەتی لە گۆڤارێکی ئاست بەرز بڵاودەکەنەوە

posted Feb 17, 2021, 11:29 AM by Barham Khalid Ahmed   [ updated Feb 17, 2021, 11:31 AM ]

دوو مامۆستای بەشەکانی کۆمەڵناسی و کاری کۆمەڵایەتی توێژینەوەیەکی هاوبەش دەربارەی کۆرۆنا لە یەکێک لە گۆڤارە خاوەن ئیمپاکت فاکتەرە بەرزەکان بڵاودەکەنەوە.
پرۆفیسۆر د. نەجات محەمەد فەرەج لە بەشی کۆمەڵناسی و پرۆفیسۆر د.نیان نامق صابر لە بەشی کاری کۆمەڵایەتی توێژینەوەیەکی هاوبەش بە ناونیشانی لێکەوتەکانی پەتای کۆرۆنا لەسەر دۆخی دەرونی و کۆمەڵایەتی خێزانی کورد لە گۆڤاری ریماکی نێودەوڵەتی بۆ زانستە مرۆیی و کۆمەڵایەتییەکان بڵاوکردەوە. توێژینەوەکە بە شێوەیەکی مەیدانی لە هەرێمی کوردستان ئەنجامدراوە.

گۆڤارەکە خاوەنی ئیمپاکت فاکتەری ١.٠١٢ یە و یەکێکە لە گۆڤارە بەناوبانگەکان لە بواری زانستی مرۆڤایەتی و زانستە کۆمەڵایەتییەکاندا.

 لینکی گۆڤارەکە: https://www.rimakjournal.com/?utm_source=researchbib
لینکی توێیژینەوەکە: https://www.rimakjournal.com/journaldetail/the-implication-of-corona-pandemic-on-the-psychological-and-social-status-of-the-kurdish-family_104




کۆلێژی زانستە مرۆڤایەتییەکان و کۆلێژی پەروەردەی ئین روشدی زانکۆی بەغداد یاداشتێکی لێکتێگەیشتن ئیمزا دەکەن

posted Feb 11, 2021, 6:26 AM by Barham Khalid Ahmed   [ updated Feb 11, 2021, 9:36 AM ]

بە مەبەستی هاوکاری و هەماهەنگی زانستی و ئەکادیمی هەردوو کۆلێژی زانستە مرۆڤایەتییەکانی زانکۆی سلێمانی و کۆلێژی پەروەردەی ئیبن روشدی زانکۆی بەغداد یاداشتێکی لێکتێگەیشتن ئیمزا دەکەن.

رۆژی پێنجشەممە ١١ی٢ی٢٠٢١ وەفدێکی کۆلێژی پەروەردەی ئیبن روشد بۆ زانستە مرۆڤایەتییەکانی سەر بە زانکۆی بەغداد سەردانی کۆلێژی زانستە مرۆڤایەتییەکانیان کرد لە زانکۆی سلێمانی و پاش ئەنجامدانی گفتوگۆیەکی زانستی بە مەبەستی هاوکاریکردنی یەکتر لە بواری زانستی و دروستکردنی پەیوەندی و هەماهەنگی ئەکادیمی یاداشتێکی لێکتێگەیشتنیان ئیمزاکرد.
وەفدەکەی کۆلێژی ئیبن روشد پێکهاتبون لە هەریەک لە پرۆفیسۆر، د.علاوي سادر جازع، راگری کۆلێژ و د.حیدر ‌عبدالزهرة یاریدەدەری راگر و د.غادة  علي هادي بەڕێوەبەری یەکەی مافی مرۆڤ و ئەمینداری ئەنجومەنی کۆلێژ و د. فراس سعداللە رحیم، بەرێوەبەری خوێندنی ئەلکترۆنی کۆلێژی ئیبن روشد. وەفدەکە لەلایەن د.ئیبتیسام اسماعیل قادر، راگری کۆلێژ و د.ئامانج حەسەن، یاریدەدەری راگر و سەرۆکی بەشەکانی کۆمەڵناسی، راگەیاندن، جوگرافیا، کاری کۆمەڵایەتی و شوێنەوارەوە پێشوازی کران و لە کۆبونەوەیەکدا باسیان لە گرنگی بونی پەیوەندی لە نێوان زانکۆکانی هەرێمی کوردستان و عێراقدا کرد بە مەبەستی ئەنجامدانی توێژینەوەی زانستی هاوبەش و ئاڵوگۆڕی خوێندن و سەرپەرشتی خوێندنی باڵا لە نێوان هەردوو کۆلێژدا. 
لە کۆتاییدا راگری کۆلێژی ئیبن روشد خەڵاتی رێزلێنانی کۆلێژەکەی بەخشییە د. ئیبتیسام اسماعیل راگری کۆلێژی زانستە مرۆڤایەتییەکان لە پای هەوڵەکانی بۆ لێک نزیکردنەوەی هەردوو کۆلێژ و دروستکردنی پەیوەندی زانستی لە نێوانیاندا.

گفتوگۆی ماستەرنامەیەک سەبارەت بە رۆڵی بەرنامەکانی گفتوگۆی تەلەفزیۆن لە سازاندنی بڕیاری سیاسیدا

posted Jan 25, 2021, 1:57 PM by Barham Khalid Ahmed

لە بەشی راگەیاندنی کۆلێژی زانستە مرۆڤایەتییەکان گفتوگۆی ماستەرنامەی خوێندکار (ئاشنا عبداللە قادر) بە ناونیشانی (رۆڵی بەرنامەکانی گفتوگۆی تەلەڤزیۆنی لە سازاندنی بڕیاری سیاسیدا) بەڕێوەچوو.
تاووتوێی ماستەرنامەکە لە هۆڵی بابان لە کۆلێژی زانستە مرۆڤایەتییەکان لە رۆژی ٢٥ی ١ی ٢٠٢١ بەڕێوەچوو. پاش نزیکەی  ٤ کاتژمێر گفتوگۆ لەلایەن ئەندامانی لیژنەی گفتوگۆوە ماستەرنامەکە بە کەمێک دەستکاریییەوە بە پلەی زۆرباش وەرگیرا.
ئەندامانی لیژنەی گفتوگۆ لەم بەڕێزانە پێکهاتبوو:

١- پرۆفیسۆری یاریدەدەر د. هێمن حسن مجید           زانکۆی سلێمانی                 سەرۆکی لیژنە
٢-پرۆفیسۆری یاریدەدەر د. سامان جلال مولود          زانکۆی سەڵاحەدین                  ئەندام
٣- د. هەژار محمد جلال                                زانکۆی پۆلیتەکنیکی سلێمانی         ئەندام
٤- د. اکرم فریدون حمەامین                            زانکۆی سەڵاحەدین               ئەندام و سەرپەرشتیار




وەفدێکی حزبی پێشکەوتنی عێراق سەردانی کۆلێژی زانستە مرۆڤایەتییەکانی کرد

posted Jan 25, 2021, 1:45 PM by Barham Khalid Ahmed   [ updated Jan 26, 2021, 12:26 PM ]

بە مەبەستی ئەنجامدانی گفتوگۆیەکی کراوە و ئاڵوگۆڕی زانیاری، وەفدێکی حزبی پێشکەوتنی عێراقی و سەنتەری یەرموک و زانکۆی ئەنبار سەردانی کۆلێژی زانستە مرۆڤایەتییەکانی زانکۆی سلێمانیان کرد و بڕیاردرا کۆنفرانسێکی زانستی هاوبەش لە زانکۆی سلێمانی ئەنجامبدرێت.

رۆژی دووشەممە ٢٥ی ١ی ٢٠٢١ د.ئیبتیسام اسماعیل قادر، راگری کۆلێژ و یاریدەدەری راگر و سەرۆکی بەشە زانستییەکانی کۆلێژ و د.کمال عبداللە یاریدەدەری راگری کۆلێژی سیاسەت، پێشوازیان لە وەفدێکی حزبی پێشکەوتن (حزب تقدم) کرد کە لەلایەن محمد حەلبوسی سەرۆکی ئەنجومەنی نوێنەرانی عێراقەوە سەرۆکایەتی دەکرێت. وەفدەکە پێکهاتبون لە  د.عمار العزاوی، بەڕێوەبەری سەنتەری یەرموک بۆ پلاندانان و لێکۆڵینەوەی ستراتیژی و د. عادل فرج الحلبوسی، بەڕێوەبەری راگەیاندنی حزبی پێشکەوتن و کۆمەڵێک مامۆستای زانکۆی ئەنبار کە بە مەبەستی گفتوگۆ و ئاڵوگۆڕی زانیاری سەردانی کۆلێژی زانستە مرۆڤایەتییەکانیان کردبوو.

سەرەتای کۆبونەوەکە، د. ئیبتیسام ئیسماعیل کورتەیەکی لەسەر مێژووی زانکۆی سلێمانی بۆ ئەندامی وەفدەکە خستەڕوو، هەروەها رۆڵی زانکۆی سلێمانی لە سەرجەم کایەکانی کۆمەڵگادا باسکرد. هەریەک لە د. د.عمار العزاوی و د. عادل الکلبوسی ئامانجی دامەزراندنی حزبە نوێیەکە و روانین و بەرنامەکانیان بۆ ئەندامانی ئەنجومەنی کۆلێژ خستەڕوو. پاشان گفتوگۆیەکی کراوە بەڕێوەچوو سەبارەی بە هەڵبژاردنەکانی داهاتووی عێراق و گرنگی لە پێشخستنی وڵات.

لە کۆتایی کۆبونەکەدا هەردوو وەفد گەیشتنە رێکەوتن بە ئەنجامدانی کۆنفرانسێکی زانستی لە زانکۆی سلێمانی لە نێوان هەریەک لە زانکۆی سلێمانی و زانکۆی ئەنبار و سەنتەری یەرموک بۆ لێکۆڵینەوە کە لە ئایندەیەکی نزیکدا ئامانج و بەرنامە و کاتی کۆنفراسەکە ئاشکرا دەکرێت.




مامۆستایەکی کۆلێژی زمان ٧٠ کتێبی بواری راگەیاندنی بەخشییە کتێبخانەی کۆلێژ

posted Jan 19, 2021, 11:53 AM by Barham Khalid Ahmed   [ updated Jan 21, 2021, 11:36 AM ]

مامۆستایەکی کۆلێژی زمانی زانکۆی سلێمانی ٧٠ تایبەت بە بواری راگەیاندنی بەخشییە کتێبخانەی کۆلێژی زانستە مرۆڤایەتییەکان کە دوان لە کتێبەکان دانراوی خۆیەتی.

رۆژی سێشەممە ١٩ی ١ی ٢٠٢١ د. ژینۆ عەبدوڵلا مامۆستا لە کۆلێژی زمانی زانکۆی سلێمانی سەردانی کۆلێژی کردوو ٧٠ کتێبی تایبەت بە بواری راگەیاندنی پێشکەشی کتێبخانەی کۆلێژی زانستە مرۆڤایەتییەکان کرد.
د. ئیبتیسام ئیسماعیل، راگری کۆلێژی زانستە مرۆڤایەتییەکان پێشوازی کردوو سوپاس و پێزانینی خۆی ئاراستەی ئەو مامۆستایەکرد لە بەرامبەر بەخشینی ئەو کتێبانە کە تایبەتن بە بواری راگەیاندن و سودی دەبێت بۆ مامۆستایان و خوێندکارانی ئەو بوارە.


سەرۆکی زانکۆ هۆڵەکانی تاقیکردنەوەکانی کۆلێژی بەسەرکردەوە

posted Jan 19, 2021, 11:39 AM by Barham Khalid Ahmed

سەرۆکی زانکۆی سلێمانی هۆڵەکانی تاقیکردنەوەکانی وەرزی یەکەمی  قۆناغەکانی سێیەم و چوارەمی بەشەکانی کۆلێژی زانستە مرۆڤایەتییەکانی بەسەرکردووە کە بە رەچاوەکردنی رێوشوێنە خۆپارێزییەکان بەڕێوەدەچێت.

رۆژی سێشەممە ١٩ی ١ی ٢٠٢١ لە بەسەرکردنەوەیەکیدا، د. رەزا حەسەن، سەرۆکی زانکۆی سلێمانی بە یاوەری د. پێشڕەو حەمەجان، یاریدەدەری سەرۆکی زانکۆی بۆ کاروباری خوێندنکاران سەردانی کۆلێژی زانستە مرۆڤایەتییەکانی کرد بەمەبەستی بەسەرکردنەوە و ئاگاداربوون لە بەڕێوەچونی پرۆسەی تاقیکردنەوەکانی وەرزی یەکەمی قۆناغەکانی سێ و چوار.

سەرۆکی زانکۆی بە یاوەری د.ئیبتیسام ئیسماعیل، راگری کۆلێژ و د.ئامانج حەسەن، یاریدەدەری راگر هۆڵەکانی تاقیکردنەوەکانی بەسەرکردەوە و ستایشی راگرایەتی و بەشەکانی کۆلێژ و لیژنەی تاقیکردنەوەکانی کرد کە بە رەچاوکردنی رێنماییە تەندروستییەکان پرۆسەی تاقیکردنەوەکان بەڕێوەدەبەن و هیوای سەرکەوتنی بۆ خوێندکاران خواست لە تاقیکردنەوەکانیاندا.
لە سەرەتای هەفتەوە بە جێبەجێکردنی رێنماییە تەندروستییەکان بۆ رێگریکردن لە بڵاوبونەوەنی ڤایرۆسی کۆرۆنا، تاقیکردنەوەکانی وەرزی یەکەم لە کۆلێژی زانستە مرۆڤایەتییەکان دەستیپێکردوەو پرۆسەکە بە شێوازێکی باش بەڕێوەدەچێت.




1-10 of 268