News and events‎ > ‎

بەشی راگەیاندن یادی ١١٩ ساڵەی رۆژنامەگەری کوردی کردەوە

posted Apr 22, 2017, 11:43 PM by Barham Khalid Ahmed   [ updated Apr 23, 2017, 2:33 AM ]
ە یادی ١١٩ ساڵەی دەرچونی یەکەمین رۆژنامەی کوردیدا، بەشی راگەیاندنی کۆلێژی زانستە مرۆڤایەتییەکان لە زانکۆی سلێمانی چەند چالاکییەکی بۆ ئەو یادە رێکخست.

بەیانی رۆژی شەممە ٢٢-٤-٢٠١٧ لە هۆڵی کۆماری کوردستان لە کۆلێژی زانستە مرۆڤایەتییەکان بە ئامادەبونی خوێندکاران و مامۆستایان و ژمارەیەکی زۆر لە رۆژنامەنوسان و میوانانی دەرەوە لە کەسایەتی و  پەرلەمانتاران و بەرپرسانی و نوێنەری پارت و دەزگاکانی حکومەت مەراسیمەکە بە چەند ساتێک وەستان بۆ گیانی شەهیدانی کوردستان دەستی پێکرد.


سەرۆکی بەشی راگەیاندن، د.سەلام نەسرەدین وتەیەکی پێشکەشکرد و ئاماژەی بەوەدا کە سەرەرای قەیرانەکان بەشی راگەیاندن وەک نەریتی ساڵانە بریاریدا جیاوازتر ئەو یادە بکاتەوە و گفتوگۆیەک لە نێوان رۆژنامەنوسان و مامۆستایانی بەشی راگەیاندن دروست بکات لە پێناو ئەوەی بە هەردوو لا بتوانن میدیای کوردی بەرەو ئەکادیمبون و پرۆفیشنالیەت ببەن.

هەروەها د. هێرش عەبدوڵا، یاریدەدەری راگری کۆلێژی زانستە مرۆڤایەتییەکان لە وتەیەکدا باسی لە گرنگی راگەیاندن کرد لە پەرەپێدانی کۆمەڵگاو ئەوەشی خستە ڕوو کە راگەیاندن دەتوانێت رۆلی گرنگ ببینێت لە پرۆسەی دیموکراسی و هۆشیارکردنەوەدە بە تایبەت لەم قۆنا‌غەی ئێستای مێژوی کوردستاندا.

مەراسیمی یادی رۆژنامەگەری کوردی لە بەشی راگەیاندن لە چەند چالاکییەک پێکهاتبوو لەوانە کردنەوەیە پێشانگایەکی فۆتۆگرافی لە کاری خوێندکاران و بەڕێوەچونی دوو پانێل بەڕێوە چوو؛ یەکەمیان دەربارەی ئاستەنگەکانی بەردەم مێدیای کوردی پاش ١١٩ ساڵ بە بەشداری ستران عەبدوڵا، سەرنوسەری رۆژنامەی کوردستانی نوێ. نورەدین وەیسی،بەڕێوەبەری کەناڵی کوردستان ٢٤. بەرزان شێخ عوسمان، بەڕێوەبەری پێشوی رادیۆی دەنگی گەلی کوردستان. هانا شوان، سەرنوسەری پێشوی رۆژنامەی رێوان کە مامۆستا بەرهەم خالید پانێڵەکەی بەڕێوەبرد و لەم پانێڵەدا پانێڵیستەکان باسیان لەو ئاستەنگانە کرد کە ئێستا لەبەردەم مێدیای کوردیدان لەوانە ئاستەنگی ژینگەی سیاسی و کۆمەڵایەتی و هەروەها ئاستەنگە پیشەییەکان و نەبونی ناسنامە  بۆ مێیدیای کوردی ئەوە جگە لە گرفت دارایی و توانا مرۆییەکان لە اکری رۆژنامەنوسیدا. 

پانێڵی دووەم بە ناونیشانی لێکەوتەکانی بە ئەکادیمیکردنی مێدیا لە هەرێمی کوردستان بە بەشداری کاوە ئەمین، بەرپرسی نوسینگەی کەناڵی روداو لە سلێمانی. خەڵەف غەفور، سەرنوسەری ماڵپەڕی مەوداپرێس. چیمەن محەمەد، رۆژنامەنوس. د. ئیبراهیم سەعید، مامۆستای بەشی راگەیاندن. هەروەها بەڕێوەبەی پانێڵ مامۆستا چرۆ شەهاب، مامۆستای بەشی راگەیاندن. لەم پانێڵەدا پانێڵیستەکان باسیان لە گرفتی نێوان مێدکارانی خۆڕسک و مێدیاکارانی ئەکادیمی کردو بە گرنگیەوە باسیان لەوەکرد کە باشترە مێدیاکار جگە لەوەی حەز و خولیای بۆ کارەکای هەبێت هەڵگری بڕوانامەش بێت لەو بوارەدا و بە گرنگیەوە ئاماژەیان بەوە کرد کە دەرچوانی بەشەکانی راگەیاندن و ناوەندە ئەکادیمیەکان رۆڵیان باشیان هەبوە لە بەرەو پێش بردنی مێدیا لە کوردستان بۆیە پێویستە هەماهەنگی باشتر هەبێت لە نێوان دەزگاکانی راگەیاندن وناوەندە ئەکادیمیەکانی زانکۆکاندا. 

هەرلە یادەکەدا ژمارەیەکی نوێی رۆژنامەی روماڵ ىڵاو کرایەوە کە لە لایەن خوێندکارانی بەشی راگەیاندنەوە دەردەچێت . هەروەها لە کۆتاییدا چەند بەرهەمێکی تەلەفزیۆنی خوێندکاران نمایشکرا کە تایبەت بە یادەکە ئامادەکرابوو.

119 years





Comments