News and events‎ > ‎

چالاکی بەشی جوگرافیا و راگەیاندن لە رۆژی ژینگەی کوردستاندا

posted Apr 16, 2017, 3:03 PM by Barham Khalid Ahmed
 

لە ژێرناونیشانی( بەگەڕخستنی تواناكان لە پێناو پاراستنی ژینگەدا) بەشی جوگرافیا بەهاوكاری بەشی ڕاگەیاندنی كۆلێژی زانستەمرۆڤایەتییەكان و بە ئامادەبوونی پڕۆفیسۆری یاریدەدەر دكتۆر ڕەزا حەسەن سەرۆكی زانكۆی سلێمانی و دكتۆر ئاراس فەریق زەینەڵ یاریدەدەری سەرۆكی زانكۆ بۆ كاروباری خوێندكاران و دكتۆر ئیپتیسام ئیسماعیل ڕاگری كۆلێج و دكتۆر كارزان تۆفیق ڕاگری فاكەڵتی زانستە كشتوكاڵییەكان و ژمارەیەك لە ڕاگر و مامۆستایان و خوێندكارانی زانکۆ و میوانانی دەرەوە لە ڕۆژی ژینگەی كوردستاندا زنجیرە سییمیناریان ڕێكخست.

سەرلە بەیانی ئەمڕۆ 16 /4/ 2017 لە هۆڵی كۆماری كوردستان لە كۆلێجی زانستەمرۆڤایەتییەكان لە ڕۆژی ژینگەی كوردستاندا چەند چالاکی و سیمینارێک رێکخرا، سەرەتا لەگەڵ ووتنی مارشی نیشتیمانی ئەی رەقیب و چەند ساتێک وەستان بۆ گیانی پاكی شەهیدان چالاکییەکە دەستیپێکرد و پاشان دكتۆر ئیبتسام ئیسماعیل، ڕاگری كۆلێجی زانستەمرۆڤایەتییەكان بەخێرهاتنی سەرۆكی زانكۆی سلێمانی و یاریدەدەرانی سەرۆكی زانكۆ و ڕاگر و میوانەكانی كردوو لە ووتەیەكیدا ڕایگەیاند: بەرزكردنەوەی ئاستی هۆشیاری ژینگەیی بۆتە بابەتێكی گرنگ لەم سەردەمەدا و بوونی پێویستە بۆ ئەوەی پارێزگاری لە ژینگە بكات و سنورێك بۆ ڕەفتارە نەرێنییەكان دابنرێت، كە هەڕەشەن بۆ سەر ژینگە، دەوڵەت، دامەزراوە جۆراوجۆرەكان  و دامەزراوە كۆمەڵایەتییەكان بەرپرسن لە بەخشینی ئەو هۆشیارییە.


ڕاگری كۆلێجی زانستەمرۆڤایەتییەكان ئاماژەی بەوەشدا كە زانكۆی سلێمانی وەكو دامەزراوەیەكی ئەكادیمی و ئەركی زیاتری لە ئەستۆیە و ووتی پێویستە ئەمڕۆ بە هەموومان ژینگەی دەوروبەرمان بپارێزین و هانی خوێندكاران و مامۆستان و سەرجەم تاكەكان بدەین لەجێی خۆیانەوە كار لەسەر پاراستنی ژینگە بكەن، هەر لە درێژەی ووتەكەیدا دكتۆر ئیپتیسام ئیسماعیل ووتی:ئێمە لە كاتێكدا و لەمڕۆژەدا كۆدەبیتەوە و دەشزانین كە ژینگەی ناو زانكۆمان تائێستا وەك پێویست نیە بۆنموونە درەختەكان زۆری لەبەر قەیرانی دارایی و نەبوونی خزمەتی بەردەوام وەك پێویست گەشەیان نەكردووە و لە هەندێك جێگە پاكوخاوێنی وەك پێویست نیە كە ئەمانە ئەركی ئێمەشە لە جێگەی خۆمانەوە كاری بۆ بكەین تا بتوانین ڕێژەی سەوزایی بگەیەنینە13%ی ستانداردی جیهانی.

لە كۆتایشدا ڕاگری كۆلێجی زانستەمرۆڤایەتییەكان دەستخۆشی لە بەشی جوگرافیا و ڕاگەیاندن كرد كە توانییان لەم ڕۆژەدا زنجیرە سیمینارێكی گرنگ لە بواری ژینگەدا ئەنجامبدەن كە بابەتێكی گرنگی كۆمەڵگا كەمانە كە تاڕادەیەكی زۆر گرنگی پێنادرێت.


دواتر دكتۆر ڕەزا حەسەن سەرۆكی زانكۆی سلێمانی ووتارێكی پێشكەشكردوو ڕایگەیاند: كە ئەمڕۆ لەگەڵ ئەوەی كە ڕۆژی ژینگەی كوردستانە و هاوكاتە لەگەڵ كیمیابارانی دۆڵی جافایەتی كە لە ساڵی 1987 بەچەكی كیمیایی لەلایەن ڕژێمی بەعسی ڕوخاوەوە كرایە سەر ئەم ناوچەیە و كە ئەمەش تەنها دژی مرۆڤایەتی نەبووە بەڵكو كاریشی كردۆتە سەر ئاو، خاك وهەوا و گیانەوەر و تەنانەت ڕووەكی ئەو ناوچانەشیان وێرانكردوە، سەرۆكی زانكۆی سلێمانی ئاماژەی بەوەشدا كە ئێمە ئەمڕۆ بۆ بابەتێك كۆبوینەتەوە كە زۆرترین قسەوباس هەڵدەگرێت لە دونیای ئەمڕۆدا و ووتی چۆنێتی پاراستنی ژینگە و چارەسەركردنی ژینگەی شێواو گەورەترین خەمی مرۆڤایەتییە و ووتی پاراستنی ژینگە و دەوروبەری لە ڕووی ئەكادیمی و توێژینەوەوە جوڵەیەكی گەورەی بە دوای خۆیدا هێناوە و توێژەرانی ئەم بوارەش بەردەوام لە هەوڵی دۆزینەوەی ڕێگەچارەیەكن لە بوارەكەدا ، بەڵام لەلایەكی ترەوە مرۆڤەكان هەمیشەخەریكی پیسكردنین.



هەر لە درێژەی قسەكانیدا دكتۆر ڕەزا حەسەن ووتی:هەروەك چۆن پاراستنی ژینگە لە پیسبوون كارێكی نیشتیمانی و مرۆڤایەتی و ئەخلاقییە لەهەمان كاتدا كارێكی ئایینیشە بە جۆرێك لەسەرجەم كتێبە ئاسمانی و فەرموودەكانی پێغەمبەراندا ئاماژە بە پاكوخاوێن ڕاگرتنی ژینگە دراوە، هەر بۆ ئەم مەبەستەش وەزارەتی خوێندنی باڵاو توێژینەوەی زلنستی لەگەڵ هەر دوو وەزارەتی پەروەردە و ئەوقافدا بۆ ئەم ساڵ كەمپەینێكی ڕاگەیاند بۆ هۆشیاركردنەوەی سەرجەم چین و توێژەكانی كۆمەڵگا لە پێناو پاراستنی ژینگەی كوردستانلەكۆتایی قسەكانیدا سەرۆكی زانكۆ دەستخۆشی لە رێكخەرانی سیمینارەكە كردوو هیوای سەركەوتنی بۆ خواستن.


هەروەها لە دوو دانیشتندا زنجیرە سیمینارێك لەلایەن ژمارەیەك لە مامۆستایان و شارەزایانی بواری ژینگەییەوە لە دوو كاتی جیاوازدا خرانە بەرباس و پاشانیش گفتوگۆیان لە بارەوە كرا كە سەرجەمیان تایبەتبوون بە كاریگەری و هۆكاری پیسبوون و گۆڕانكارییە ژینگەییەكان لەگەڵ نمایشكردنی فلیمێكی دیكۆمێنتاری دەربارەی ژینگەی کوردستان و دواتریش باسەکان بە پرسیار و گفتوگۆی بەشداربوان دەوڵەمەندکرا.





Comments