لە چوارچێوەی چالاکییەکانی یادی پەنجا ساڵەی دامەزراندنی زانکۆی سلێمانی، کۆلێژی زانستە مرۆڤایەتیەکانیش بە ڤێستیڤاڵێک کە لە چەند چالاکییەکی جۆراوجۆر پێکهاتبوو یادەکەی بەرز راگرت.

رۆژی پێنج شەممە ٢٩ ی ١١ی ٢٠١٨ لە هۆڵی کۆماری کوردستان لە کۆلێژی زانستە مرۆڤایەتییەکان و لەچوارچێوەی یۆبیلی زێڕینی دامەزراندنی زانکۆی سلێمانی  فیستیڤاڵی کۆلێج بەڕێوەچوو. کە تێیدا ژمارەیەکی زۆر لە مامۆستایان و خوێندکاران و میوانانی دەرەوە ئامەدەبون.

سەرەتای فێستیڤاڵەکە بەچەند ساتێک وەستان بۆ گیانی پاکی شەهیدان دەستیپێکرد و پاشان وتاری راگرایەتی کۆلێژ لەلایەن د. ئامانج حەسەن، یاریدەدەری راگر خوێندرایەوە  و پیرۆزبایی یادی پەنجا ساڵەی دامەزراندنی زانکۆی سلێمانی کرد و سوپاسی بەشداربووان و مامۆستایان و خوێندکارانی کرد لەپای بەشدارییان لەم یادە پیرۆزەدا و سازدانی فێستیڤاڵەکە.

دواتر وتاری نوێنەرایەتی گشتی خوێندکاران لەلایەن محەمەد خالید پێشکەشکراو بەناوی خوێندکارانەوە پیرۆزبایی یادی پەنجا ساڵەی دامەزراندنی لە خوێندکاران و مامۆستایان کرد لای خۆیەوە  سوپاسی ڕاگرایەتی کۆلێجی زانستەمرۆڤایەتیەکان کرد کە هاوکار و هەماهەنگ بوونە بۆ بەشداری خوێندکاران لە یادەکە تا خوێندکارانان چالاکیەکانیان پێشکەش بکەن

فێستیڤاڵەکە لە کۆمەڵێک چالاکی پێکهاتبوو لەوانە کردنەوەی پێشانگایەکی فۆتۆگرافی کە بەرهەمی خوێندکارانی بەشی راگەیاندن بوون و پاشان چەند پارچە هۆنراوەیەک پێشکەشکران و دواتریش فیلمێکی بەڵگەنامەیی دەربارەی زانکۆی سلێمانی نمایشکرا و دواتریش بە نمایشکردنی شانۆگەرییەک  و ئاهەنگ و گۆرانی کۆتایی بە چالاکییەکان هات.