News and events‎ > ‎

لە زانكۆی سلێمانی زنجیرە چالاکییەک بۆ رۆژی ژنان بەڕێوەچوو

posted Mar 6, 2018, 10:50 AM by Barham Khalid Ahmed

لە ژێر ناونیشانی (ژن ناسنامەی کۆمەڵە) و بە بۆنەی رۆژی جیهانی ژنان سەنتەری خوێندنی جێندەرو توندوتیژی سەر بە زانكۆی سلێمانی چەند چالاكییەكی جۆراو جۆری ئەنجامدا.

ئەمڕۆ سێشەممە ٦ی ئاداری ٢٠١٨ زانکۆی سلێمانی رۆژی جیهانی ژنانی بەرزراگرت. سەرەتا كاتژمێر 9:30  بەیانی چالاكییەكان بە ناشتنی نەمامی زەیتون لەبەردەم  سەرۆكایەتی زانكۆی سلێمانیدا دەستیپێكرد، كە لە مەراسیمێكدا بە ئامادەبوونی پرۆفیسۆری یاریدەر پرۆفیسۆری یاریدەردەر د. رەزا حەسەن حسێن سەرۆكی زانكۆ دەر د. رەزا حەسەن حسێن سەرۆكی زانكۆ و ئەندامانی ئەنجومەنی زانكۆو چەندین مامۆستاو خوێندكار ژمارەیەك نامامی زەیتون نێژران، ئەوەش وەك پشتگیرییەك بۆ ژنانی رۆژئاوای كوردستان كە لە ئێستادا هاوشانی پیاوان لە سەنگەرەكانی بەرگری لە خاكی وڵات دژی داگیركەران بەرخۆدان دەكەن و عەفرین دەپارێزن، كە گوزارشتە لەوەی ئێمەش وەك ژنانی باشوری كوردستان لە پشتانین و پشتگیری لە بەرخۆدان و گیان بەخشیتان دەكەین.

دواتر  رێپێوانێكی هێمانانە لەبەردەم دەرگای سەرەكی كەمپی نوێی زانكۆوە بۆ بەردەم كۆلێجی زانستە مرۆڤایەتییەكان ئەنجامدرا، لە هۆڵی كۆماری كوردستان لە كۆلێژی زانستە مرۆڤایەتییەكان چالاكییەكانی دیکە دەستیپێکرد سەرەتا بەڕێز پرۆفیسۆری یاریدەردەر د. رەزا حەسەن حسێن سەرۆكی زانكۆی سلێمانی وێرای پیرۆزبایی لە ژنانی سەرجەم كوردستان بەبۆنەی 8 ی مارس رۆژی ژنانەوە وتەیەكی پێشكەشكردو رایگەیاند: سەرەتا بەبۆنەی 8ی مارسەوە پیرۆزبایی لە ژنانی جیهان دەكەم، بە تایبەتی ژنانی هەر چوار پارچەی كوردستان وە زۆر بە تایبەت پیرۆزبایی خۆمان ئاڕاستەی ژنانی رۆژئاوا دەكەین، كە هاوشانی پیاوان لەسەنگەرەكانی بەرگری لە شەرەف و خاكی كوردستان گیانی خۆیان بەخت دەكەن لەپێناوی كێشەی رەوای گەلەكەماندا .

هەروەها وتی: زانكۆی سلێمانی وەك دامەزراوەكی زانسی و پەروەردەیی و فەرهەنگی رۆڵێكی گرنگی هەیە لە هۆشیاركردنەوەی كۆمەڵگەی كوردەوانی لە سەرجەم بوارەكانی ژیاندا، بە تایبەت لە بواری خزمەتكردنی جێندەری، زانكۆی سلیًَمانی یەكەمین زانكۆ بووە كە پێش حەوت ساڵ لەمەوبەر بووە خاوەنی یەكەمین سەنتەری هۆشیاری جێندەری لە هەرێمی كوردستان، لەو ماوەیەشدا كاری زۆر گرنگ و كاریگەری كردوە لەسەر بلاوكردنەوەی هۆشیاری جێندەری، هەمان كات ئەم سەنتەرە هاوكاربووە لە بەشداری پێكردنی ژنان لەبوارە جیاجیاكاندا، بۆیە هەرلەم بۆنە پیرۆزەدا وێرای پیرۆزبایی و دەستخۆشكەری بۆ ئەم سەنتەرە، وەك سەرۆكایەتی زانكۆی سلێمانیش هەمیشە پشتگیری و هاوكاری سەرجەم داواكانیان دەبین بۆ بڵاوكردنەوەی هۆشیاو رۆشنبیری جێندەری .

دواتر لەلایەن د. تەلار بەڕێوەبەری سەنتەری جێندەرو توندروتیژی زانكۆی سلێمانی سوپاسی سەرۆكایەتی زانكۆ كرا كە هەمیشە پشتگیری و هاوكاری كارەكانی سەنتەرەكەبووە و بەرنامەو  کارەکانی دواتری سەنتەرەکەی خستەڕوو. پاشان مەراسیمی بەخشینی خەڵاتی رێزلێنان بەسەر دەستەی دامەزرێنەری سەنتەری جێندەرو ئەو ژنانەدا بەڕێوەچوو كە هاوكاری سەنتەرەكەیان كردوە چالاكی بەرچاو خزمەتیان لەوبوارەدا هەبووە.

لە بەشێکی دیکەی چالەکییەکەدا پانێڵێک پێشکەشکرا كە لەلایەن هەریەك لە د. كەژاڵ حسێن محەمەد و مامۆستان پاڤێ جەمیل و مامۆستا عومەر عەلی چەند توێژینەوەیەك لەو بوارەدا پێشكەشكران و توێژەران لە روانگەی توێژینەوەکانی خۆیانەوە تیشکیان خستە سەر بەشداری ژنان و پەیوەندی راگەیاندن و ژن و هەروەها مەسەلەی جێندەر. لە کۆتایی رێورەسمەکەدا دۆکیومێنتەرییەک دەربارەی بابەتەکە نمایشکرا.


 

Comments