News and events‎ > ‎

پانێڵی خوێندنەوەیەک بۆ دۆخی سیاسی ئێستای کوردستان لە کۆلێژی زانستە مرۆڤایەتییەکان بەڕێوەچوو

posted Feb 5, 2019, 12:35 PM by Barham Khalid Ahmed
کۆلێژی زانستە مرۆڤایەتیەکانی زانکۆی سلێمانی و ناوەندی کوردستان بۆ توێژینەوە لە ململانێ و قەیرانەکان پانێلێکیان سازکرد بە ناونیشانی خوێندنەوەیەک بۆ دۆخی سیاسی ئێستای کوردستان.

رۆژی سێشەممە ٥ی ٢ی ٢٠١٩ لە درێژەی چالاکییەکانی کۆلێژی زانستە مرۆڤایەتیەکان، پانێڵێکی هاوبەش لەگەڵ ناوەدنی کوردستان بۆ توێژینەوە لە ململانێ و قەیرانەکان سازدرا کە تێیدا لە چەند گۆشەنیگایەکەوە خوێندنەوە بۆ دۆخی سیاسی ئێستای کوردستان کرا.

لە سەرەتای پانێڵەکەدا کە لە هۆڵی بابان لە کۆلێژی زانستە مرۆڤایەتییەکانی زانکۆی سلێمانی بەڕێوەچوو، د.ئیبتیسام ئیسماعیل، راگری کۆلێژی زانستە مرۆڤایەتییەکان وتەیەکی پێشکەشکرد و تێیدا گرنگی هەماهەنگی زانکۆ و ناوەند و رێکخراوەکانی کۆمەڵگای مەدەنی کرد لە پێناو هەڵسەنگاندنی دیاردەکانی ناو کۆمەڵگا و خستنەڕوی پێشنیاز و دۆزینەوەی چارەسەر بۆیان. هەروەک باسی لەوەشکرد کۆلێژی زانستە مرۆڤایەتییەکان لە روانگەی هەستکردن بە کاریگەری دۆخی سیاسی لەسەر تەواوی سێکتەرەکانی ژیانی خەڵک هەوڵدەدات لە درێژەی چالاکییەکانیدا پەنجە بخاتە سەر کێشە و دیاردەکانی ناو کۆمەڵگا هەتا لە رەهەنی ئەکادیمیەوە خوێندنەوەیان بۆ بکات بە مەبەستی هاوکاری لایەنە پەیوەندیدارەکان لە دۆزینەوەی چارەسەر بۆیان.

پانێڵەکە بە بەشداری هەریەکە لە فەرید ئەسەسەرد، بەڕێوەبەری سەنتەری لێکۆڵینەوەی ستراتیجی کوردستان،  د. عابد خالد، راگری کۆلێژی زانستە رامیارییەکانی زانکۆی سلێمانی، د. ئیبراهیم سەعید، سەرۆکی ناوەدنی کوردستان بۆ توێژینەوە لە ململانێ و قەیرانەکان، مامۆستا هیوا عەلی مامۆستا لە کۆلێژی یاسای زانکۆی سلێمانی بەڕێوەچوو. پانێڵەکە لە لایەن د. فواد عەلی ئەحمەد، مامۆستای بەشی راگەیاندنی زانکۆی سلێمانی بەڕێوەبرا.  ژمارەیەکی زۆر لە مامۆستایانی زانکۆ و توێژەران ئامادەی پانێڵەکەبوون.

هەریەک لە بەشداربوانی پانێڵەکە لە گۆشەنیگای خۆیانەوە هەلسەنگاندنیان بۆ دۆخی سیاسی کوردستان کرد لە قۆناغی دوای هەڵبژاردنەکان و گۆڕانکارییەکانی عێراق  و وڵاتانی دراوسێ. هەروەها گفتوگۆیان کرد سەبارەت بە ئەگەرەکانی پێکهێنانی حکومەتی نوێی هەرێم و سیناریۆکانی پێکهێنانی حکومەت لە سایەی گفتوگۆکانی لایەنە سیاسییەکان.
کاریگەری دۆخی سیاسی کوردستان لەسەر سەرجەم کایە و سێکتەرەکانی ژیانی خەڵک باسی لێوەکرا و گفتوگۆیان دەربارەی کرا لە روانگەی یاسایی و راگەیاندن و بوارەکانی دیکە.

هەروەها تیشکخرایە سەر ئایندەی کوردستان لە سایەی گۆڕانکارییەکانی ناوچەکە و گوزەرانی خەڵکی کوردستان لە ماوەی ئایندەدا و ئەگەر و پێشبینیە سیاسییەکانی کوردستانیش گفتوگۆیان لەبارەوەکرا. لە کۆتایشدا بە سەرنج و پرسیاری ئامادەبوان باسەکە دەوڵەمەندتر کراو پانێلیستەکانیش وەڵامی سەرنج و پرسیارەکانیدان دایەوە.


Comments