News and events‎ > ‎

وۆركشۆپى زانكۆى سلێمانى و زانكۆى لايدن لەبارەى پێش مێژووى شارەزوور بەرێوەچوو

posted Oct 16, 2016, 12:12 PM by Barham Khalid Ahmed

هەردوو بەشی شوێنەواری زانکۆی سلێمانی و زانکۆی لایدنی هۆڵەندی وۆرکشۆپێکیان دەربارەی چەند شوێنەوارێکی ناوچەی شارەزوور ئەنجامدا.

ڕۆژى سێشەممە ٢٠١٦/١٠/١١ لەهۆڵى بابان لە كۆلێجى زانستە مرۆڤايەتييەكانى زانكۆى سلێمانى وۆركشۆپەکە لەنێوان بەشى شوێنەوارى زانكۆى سلێمانى و كۆلێجى شوێنەوارى زانكۆى لايدن بەڕێوەچوو. وۆركشۆپەكە لە دوو بەشی سەرەکی پێکهاتبوو؛بەشێكى بابەتى شوێنەوارى بوون كە رێکخەران پێشكەشيان كرد و بەشێكى تريشى پراكتيكى بوو تيايدا چەند سەد پارچە گڵێنەيەكى سەردەمانى پێش مێژوو پيشان دران كە لەم ساڵانەى دواييدا لەشوێنەوارەكانى پارێزگاى سلێمانى لەلايەن تيمە هەڵكۆڵەرەكانەوە دۆزراونەتەوە. 

مەبەست ل پيشاندانى ئەم پارچانە ئەوەبوو كە توێژەران و شوێنەوارناسان و خوێندكاران لە نزيكەوە ئەو پارچانە ببينن و ڕاوبۆچوونەكانيان و ئەزموونەكانيان لەگەڵ يەكتر ئاڵ و گۆڕ بكەن و بەراوورد بكەن بۆ گەيشتن بە ديدێكى گشتگير لەسەر مێژوو و فەرهەنگ و هونەرى كوردستان لەو سەردەمانەدا و ببێـە ڕێ پيشاندەريان لە توێژينەوەكانى داهاتووياندا.

بابەتە پێشكەشكراوەكان لەلايەن ئەو شوێنەوارناس و توێژەرە پسپۆرانەوە پێشكەش كران كە خۆيان بە مەيدانى لە كاردا و لە پشكنين و هەڵكۆڵيندا بەشدار بوون و بەگشتى گەيشتنە ئەو ئەنجامەى كە فەرهەنگەكانى پێش مێژووى كوردستان لەزۆر ڕووەوە لە فەرهەنگە هاوكاتەكانى هاوسێيان جياوازن و جياكەرەوەى تايبەت بەخۆيان هەيە و ناسنامەيەكى كولتورى بە كوردستانى كۆن دەبەخشن.

لەپاش هەر بابەتێكيش دەرگاى پرسيار و وەڵام كراوەبوو بۆ ئامادەبووان وهەندێك لە بابەتەكان ووتووێژى گەرمو گوڕ و زانستيان لەسەر كرا و بابەتەكانيان دەوڵەمەندتر كرد.

سەرەتا (ئۆليڤيە نيوينهاوزە - زانكۆى لايدن و كۆزاد محمد -زانكۆى سلێمانى) باسيان لە بابەتەكانى سەرهەڵدان و پەيدابوونى كولتورى سەردەمى حەلەف و ئەو فەرهەنگە لە شارەزوور و پێگەى كوردستان لەو فەرهەنگەدا و مێژووى پاشماوەكانى ئەو كولتورە كە لە گردى بەگم لە شارەزوور دۆزراوەتەوە و لە ڕێگاى كاربۆن ١٤ ەوە دەستتنيشان كراون و دۆزراوە نوێيەكانى قەڵاتى سەيد ئەحمەدان و گڵچنەى سەردەمى بەردينى-كانزايى لە ڕۆژهەڵاتى ديجلە و چياكانى زاگرۆس باسكران و گەلێك وێنەو سلايد و نەخشە و خشتەى زانستيى بەسوود پيشاندران. 

ئەم زانکۆ و دامەزراوە زانستییانە بەشداری وۆرکشۆپەکەبوون: زانکۆی لایدن-هۆڵەندا> زانکۆئ ئازاد بەرلین-ئەڵمانیا، زانکۆی تۆکیۆ-ژاپۆن، زانکۆی تسوکوبا-ژاپۆن، مەڵبەندی نیشتمانی لێکۆڵینەوەی زانستی-پاریس-فەرەنسا، پەیمانگای فەرەنسی بۆ رۆژهەڵاتی نزیک-پاریس-فەرەنسا، زانکۆی ئۆدینی-ئیتاڵیا، زانکۆی ئۆتۆنۆمی-بەرشەلۆنا-ئیسپانیا.



 

 ١- ئۆليڤيە نيوەنهاوزە زانكۆى لايدن - هۆڵەندا

٢- ماريا بيانكا دى ئەننا زانكۆى ئازادى بەرلين - ئەڵمانيا

٣- تاكاهيرۆ ئۆداكا زانكۆى تۆكيۆ - يابان

٤- ئەكيرا تسونێكى زانكۆى تسوكوبا - يابان

٥- كۆزاد محمد زانكۆى سلێمانى

٦- ڕێگى ڤالێ مەڵبەندى نيشتيمانيى لێكۆڵينەوەى زانستى - پاريس - فەرەنسا

٧- جۆنى بالدى پەيمانگاى فەرەنسى بۆ ڕۆژهەڵاتى نزيك - پاريس- فەرەنسا

٨- ماركۆ لامۆنى زانكۆى ئودينێ - ئيتاليا

٩- والتەر كروێلز زانكۆى ئۆتۆنۆميى بەرشەلۆنە - ئيسپانيا

١٠- ئەننا گۆمێز زانكۆى ئۆتۆنۆميى بەرشەلۆنە - ئيسپانيا

Comments