News and events‎ > ‎

یادی ١٢١ ساڵەی رۆژنامەگەری کوردی بەڕێوەچوو

posted Apr 22, 2019, 2:01 PM by Barham Khalid Ahmed

بە دروشمی خوێندنەوەیەک بۆ دوێنێ بەرچاو روونیەک بۆ ئایندەی رۆژنامەگەری کوردی بەشی راگەیاندن لە کۆلێژی زانستە مرۆڤایەتییەکان بە هاوبەشی لەگەڵ بنکەی ژین لە یادی ١٢١ ساڵەی دەرچونی یەکەمین رۆژنامەی کوردیدا چەند چالاکییەکی رێکخست.

وەک نەریتێکی ساڵانەو لە یادی رۆژنامەگەری کوردیدام بەشی راگەیاندن لە کۆڵێژی زانستە مرۆڤایەتییەکان ئەمڕۆ دووشەممەم ٢٢ی ٤ی ٢٠١٩ چەند چالاکییەکی رێکخست کە تێیدا پێشانگایەک و پانێڵێک و چەند چالاکییەکی هونەری بەڕێوەچوو.

سەرەتای یادەکە بە ئامادەبونی د. کاوە عەبدوڵڵا، یاریدەدەری سەرۆکی زانکۆ بۆ کاروباری زانستی  بە کردنەوەی پێشانگایەکی وێنەیی کەسایەتییە دیارەکانی بواری رۆژنامەگەری کوردی دەستیپێکرد. دواتر د. سەلام نەسرەدین، سەرۆکی بەشی راگەیاندن لە وتەیەکدا تیشکی خستە سەر بەشی راگەیاندن و ئەو چالاکیانەکەی بەڕێوەدەچن و ئاماژەی بۆ گرنگی کردنەوەی بەشی راگەیاندن کرد لە زانکۆ وەک یەکەمین بەشی زانستی لە زانکۆ لەسەر ئاستی هەرێم هەروەها چەند زانیاریەکی دەربارەی بەشەکە و ژمارەی مامۆستایان و خوێندکاران خستەڕوو.

د. ئیبتیسام ئیسماعیل، راگری کۆلێژی زانستە مرۆڤایەتیەکان لە وتەیەکدا باسی لە گرنگی بەشی راگەیاندنی زانکۆ کرد لە بە ئەکادیمیکردنی بواری رۆژنامەگەری لە کوردستان و هیوای خواست بەربەستەکانی بەردەم کاری مێدیای ئازاد لاببرێن هەتا رۆژنامەنوسان بتوانن ئازادانە بە رەچاوکردنی بنەما پیشەییەکان کاری خۆیان بکەن وەک کۆڵەکەیەکی دیموکراسیەت لە هەرێمی کوردستان. 
 
دواتر پانێڵێک بەڕێوەچوو کە لە لایەن پرۆفیسۆری یاریدەدەر، د. فواد ئەحمەد بەڕێوەبرا دەربارەی رابردوو ئێستای رۆژنامەگەری کوردی کە هەریەک لە پرۆفیسیۆرم یاسین خالید سەردەشتی مامۆستای بەشی مێژوو، سدیق ساڵح، جێگری لێپرسراوی بنکەی ژین، فایەق حەمەساڵح فۆتۆگرافەر و رۆژنامەنوس بابەتیان پێشکەشکرد.

د. یاسین سەردەشتی لە بابەتەکەیدا بە ناونیشانی کوردو کوردستان لە بایەخی رۆژنامەوانی ئەمریکیدا کە لێکۆڵینەوەیەکی مێژووییە تیشکی خستە سەر ناوی کورد و کوردستان لە رۆژنامە ئەمریکیەکاندا لە سەدەی ١٩دا کە چۆن ئەو رۆژنامانە بە گرنگیەوە بابەتی تایبەت بە کورد و کوردستان لە لاپەڕەکانیاندا بڵاوکردوەتەوە کە بەشی زۆری زانیاریەکانیان لە رێگەی گەڕیدەکانەوە بە دەست گەیشتوە  کە گرنگی زۆری هەیە بۆ مێژووی کورد و کوردستان لەو سەردەمەدا.
 
هەروەها سدیق ساڵح لە بنکەی ژین کە تایبەتە بە ساغکردنەوە و ئەرشیفکردنی رۆژنامە و دەستنوس و بەڵگەنامە مێژووییەکان ئاماژەی بە گرنگی ئەرشیفکردن و پاراستنی رۆژنامە و بڵاوکراوەکان کرد لە رووی مێژووی و فەرهەنگی بۆ کوردستان هەروەها بە تایبەت باسی بایەخی پاراستنی رۆژنامە و بڵاوکراوەکان کرد وەک بەشێکی لە مێژووی نەتەوەی کورد.

مامۆستا فایەق حەمە ساڵح  لە بابەتەکەیدا تیشکی خستە سەر مێژووی فۆتۆگراف لە هەرێمی کوردستان و ئەو بڵاوکراوانەی خستەڕوو کە دەربارەی فۆتۆ و تۆماری روداوە مێژووییەکان بە فۆتۆ بڵاوکراونەتەوە، هەروەها باسی لە گرنگی ژانر و هونەری فۆتۆ کرد لە کایەی رۆژنامەنوسی و تۆمارکردنی روداوەکان بۆ هەرێمی کوردستان. لە لایەکی دیکەوە گرنگی بواری فۆتۆی لە خوێندنی رۆژنامەنوسی لە زانکۆ خستەڕوو وەک رەگەزێکی گرنگ لە کاری مێدیا. پاشان بە گفتوگۆ و پرسیاری بەشداربوان بابەتەکان گفتوگۆی زیاتریان لەبارەوەکرا و  لە کۆتایشدا بە چەند گۆرانییەک لە لایەن خوێندکار محەمەد کامەران لە بەشی راگەیاندن کۆتایی بە چالاکییەکان هات.



Comments