News and events‎ > ‎

یەکەمین رۆژی کۆنفرانسی سلێمانی مێژوویەکی درێرین..ئەمڕۆ و سبەی پڕشنگدار بەڕێوەچوو

posted Nov 12, 2018, 10:42 AM by Barham Khalid Ahmed

بە چاودێری سەرۆکی زانکۆی سلێمانی، چوارەمین کۆنفرانسی زانستی نێودەوڵەتی کۆلێژی زانستە مرۆڤایەتییەکان بە ناونیشانی  (سلێمانی مێژوویەكی دێرین.. ئەمڕۆ سبەی پرشنگدار) دەستی بەکارەکانی کردوو لە یەکەمین رۆژی کۆنفرانسدا چەند توێژینەوەیەکی تایبەت بە بوارە جیاوازەکانی شاری سلێمانی پێشکەشکران.

ئەمڕۆ دوو شەممە 12-11-2018، بە چاودێری پرۆفیسۆری یاریدەدەر د. رەزا حەسەن سەرۆكی زانكۆی سلێمانی و بە سەرپەرشتی پرۆفیسۆری یاریدەدەر د.ئیبتسام ئیسماعیل، راگری كۆلێجی زانستە مرۆڤایەتییەكانی زانكۆی سلێمانی، و بە ئامادەبونی ژمارەیەکی زۆر لە میوانان کۆنفرانسی (سلێمانی مێژوویەكی دێرین.. ئەمڕۆ سبەی پرشنگدار) کە چوارەمین كۆنفرانسی زانستی نێودەوڵەتی، كۆلێجی زانستە مرۆڤایەتییەكانە لە هۆڵی كۆماری كوردستان دەستی بەکارەکانی کرد.


  د.ئیبتسام ئیسماعیل، راگری كۆلێجی زانستە مرۆڤایەتییەكان و سەرپەرشتیاری کۆنفرانس لە وتارێكدا ئامانج و گرنگی کۆنفرانسەکەی بۆ ئامادەبوان خستەڕوو و ئاماژەی بە گرنگی ئەم جۆرە كۆنفرانسە زانستییانە كرد لە شاری سلێمانی بەتایبەت زانكۆی سلێمانی كە مەڵبەندێكی مەعریفی و زانستی شاری سلێمانییە، هەروەها بە كورتی باسی لە مێژووی پڕ سەروەری شاری سلێمانی كرد كە لە رووی رۆشنبیری و زانستییەوە لەناوچەكەدا ناوبانگێگی دیاری هەیە،راشیگەیاند: كە زانكۆی سلێمانی وەك ناوەندێكی زانستی و مەعریفی لە سلێمانی رۆڵی كاریگەری هەبووە لە مێژووی پڕشانازی شاری سلێمانیدا كە وەك زانكۆی دایك لە هەرێمی كوردستان، ئەژماردەكرێت و لە ئێستاشدا زانكۆی سلێمانی لە پلەی پێشەوەی زانكۆكانی كوردستانەو لە سەر ئاستی ریزبەندی زانكۆكانی جیهانیش زانكۆی سلێمانی لە پلەیەكی باشدایە.


دواتر د. هەڤاڵ ئەبوبەكر پارێزگاری سلێمانی لە وتارێكدا باسی لە مێژووی شاری سلیمانی لە بوارە جیاوازەکاندا کرد و تیشکی خستە سەر لایەنە گەشەکانی شارەکە لە بواری زانستی و پیشەیی و فەرهەنگی روناکبیری و زانست و رایگەیاند: مێژووی پڕ سەروەری و ناوەندە مەعریفی و زانستییە گرنگەكەی زانكۆی سلێمانی رۆڵی زۆر كاریگەری لە ناساندنی سلێمانی بە شاری رۆشنبیری و بە گرنگیەوە باسی لە ئەنجامدانی ئەم کۆنفرانسەکرد لە پێشخستنی پارێزگای سلێمانی لە سەرجەم بوارەکاندا.


پاشان پرۆفیسۆری یاریدەدەر د. رەزا حەسەن سەرۆكی زانكۆی سلێمانی وتارێكی پێشكەشكردو دەستخۆشی لە ئامادەکاران و توێژەرانی کۆنفرانسەکە کرد و رایگەیاند: زانكۆی سلێمانی وەك ناوەندێكی مەعریفی و زانستی لە شاری سلێمانی هەمیشە پێشەنگی پێشكەوتنخوازی و بیری نوێخوازی بووە، وتیشی: ئەنجامدانی ئەم جۆرە كۆنفرانسە نێودەوڵەتییانە بۆ خۆی كاریگەری و گرنگی خۆی هەیە بۆ شاری سلێمانی و بۆ بواری زانستی و فەرهەنگی لە پارێزگاکە.


راشیگەیاند: وەك زانكۆی سلێمانی هەمیشە هاوكارو پشتیوانتان دەبین لە ئەنجامدانی كۆنفرانسی زانستی بە ئامانجی بەرەو پێشبردنی بواری زانستی و مەعریفی لە شاری سلێمانی و بەرزكردنەوەی ئاستی زانستی زانكۆ، هەروەها زۆر سوپاسی ئەو كەسانەی كرد كە رۆڵیان هەبووە لە ئامادەكردن و رێكخستنی كۆنفرانسەكە.


 پاشان فیلمێكی دۆکیمێنتری لەسەر مێژووی شاری سلێمانی و كەسایەتیە دیارەكانی مێژووی شارەكە نمایشكرا، پاشان پانێڵەكانی یەكەم رۆژی كۆنفرانسەكە دەستی پێكرد و لە ٥ پانێڵدا زیاتر لە ١٥ توێژینەوە پێشکەش بە ئامادەبوان کرا دەربارەی مێژو و جوگرافیا و کەشناسی و  جیۆپۆڵۆتیك و بوارەکانی دیکەی پڕ سەروەری شاری سلێمانی.


لە پەراوێزی کۆنفرانسەکەشدا پێشانگایەکی تایبەت بە کتێبە چاپکراوەکانی مامۆستایانی کۆلێژی زانستە مرۆڤایەتییەکان کرایەوە و بە پێی بەرنامەی  کاری کۆنفرانسەکە  رۆژی سێشەممە لە چەند پانێڵێکدا ژمارەیەکی دیکە لە توێژینەوە پێشکەش دەکرێن و کۆتایی بە کۆنفرانس دێت.

 

 

 

 

Comments