راگەیاندنی کۆنفرانسی زانستی نێودەوڵەتی؛ کفری لە روانگەی شوێنەوار و مێژووەوە

کۆنفرانسەکە بەسەرۆکایەتى: پ.د.کۆسار محمد على/سەرۆکى زانکۆى سلێمانى و پ.ى.د.چیا محمد حسن/سەرۆکى زانکۆى پۆلیتەکنیکى گەرمیان دەبێت

بەڕێوەبەری کۆنفرانس: پ.ى.د.پاڤێ جمیل أحمد/ڕاگرى کۆلێجى زانستە مرۆڤایەتییەکانى زانکۆى سلێمانى.

سەرۆکایەتى زانکۆى پۆلیتەکنیکى گەرمیان بەهەماهەنگى لەگەڵ بەشى شوێنەوارى کۆلێجى زانستە مرۆڤایەتییەکان لە زانکۆى سلێمانى، پاش چەند جارێک گفتوگۆ و تاووتوێکردن و سەردانى مەیدانى ستافى بەشى شوێنەوارى زانکۆى سلێمانى بۆ شارى کفرى و بەسەرکردنەوەى بەشێک لە شوێنەوارەکانى شارەکە لە ڕێکەوتى (٤-٧-٢٠٢٤)، بیرۆکەى ئەنجامدانى کۆنفرانسێکى زانستیى تایبەت بە شوێنەوارەکانى شارەکە و خستنەڕووى بەشێکى تر لە مێژووە دێرینەکەى گەڵاڵە بوو. هەردوولا، بڕیاریان دا کۆنفرانسێکى زانستیى نێودەوڵەتى بەناوونیشانى (کفرى لەڕوانگەى شوێنەوار و مێژووەوە) ئەنجام بدەن.

کۆنفرانسەکە پێکدێت لە پێشکەشکردنى توێژینەوە لەلایەن چەند توێژەرێکى زانکۆکانى ناوخۆ و دەرەوە. توێژینەوەکان لەژمارەیەکى تایبەتى زانکۆى سلێمانى بڵاوبکرێتەوە، کە زانکۆى سلێمانى ئەرکى لەچاپدانى بگرێتە ئەستۆ. کۆنفرانسەکە گرنگە و کارى هاوبەشى زانستى و نێودەوڵەتییە و ڕۆڵى لە ڕانکینگى زانکۆکانیشدا دەبێت.

شارى کفرى یەکێکە لە کۆنترین ئەو ناوچانەى کە ژیانى تیادا بووبێت لە کوردستان بەگشتى و باشوورى کوردستان بەتایبەتى. ئەم شارە لەئێستادا وەک مۆزەخانەیەکى زیندوو وایە خاوەنى چەندین گرد و خانوو و ناوچەى شوێنەوارییە. بەڵام، فەرامۆشکراوە و ئەم کەلەپورە گرنگەى مرۆڤایەتى کە لە شارى کفرییە خەریکە تەواو پەراوێزتر دەخرێت.

لەئێستادا جیهان بەلاى زیندووکردنەوەى بەها کۆنەکانى مرۆڤایەتییە لە شوێنەوار و ناساندنیەتى بە نەوەکانى ئەمڕۆ و هەروەها بەمەبەستى خستنەگەڕى بازاڕى کار و بوژاندنەوەى گەشتوگوزار لەناوچەکە و کوردستان بەگشتى، ئەم کۆنفرانسە گرنگە ئەنجام بدرێت. بۆیە، بەهاوبەشى پسپۆڕانى نێودەوڵەتى و ناوخۆیى و هەماهەنگى هەردوو زانکۆ ئەم کۆنفرانسە ئەنجام دەدەین.

• ناساندنى مێژووى کوردستان و ناوچەکە لەهەزاران ساڵەوە تا ئێستا.

• ڕاکێشانى سەرنجى نێودەوڵەتى و ناوخۆیى بۆ ناساندن و ئەنجامدانى توێژینەوە لەسەر شوێنەوارەکانى شارى کفرى و دەوروبەرى.

• هۆشیارکردنەوەى خەڵکى لە پاراستنى شوێنەوارەکان بەگشتى و شوێنەوارەکانى کفرى بەتایبەتى.

• ڕاچڵەکاندنى حکومەت و لایەنە پەیوەنددارەکان بە ئاگادارکردنەوەیان لەپێویستى بوژاندنەوە و ئاگاداربوون لەمێژووى ناوچەکە.

• هاندانى ڕێکخراوە حکومى و ناحکومییەکان بۆ برەودان بەکەرتى شوێنەوارى و مێژوویی و گەشتوگوزار لەکفریدا.

• هاندانى کەرتى گەشتوگوزارى شوێنەواریى لەکفرى و بوژاندنەوەى کە مەبەستێکى سەرەکى کۆنفرانسەکەیە بۆ دەرخستنى بازاڕى کار لەناوچەکەدا.

• پێش مێژوو لە كفرى .

• بيناسازى شوێنەوارى و كەلەپوريەكانى كفرى.

• كفرى لەديدى گەڕيدەو ولآتناسان .

• كفرى لەئەنجامى كارى كنەوپشكنينە شوێنەواریيەكان.

• كفرى لە ڕوانگەى دەستنوس و بەڵگەنامە و ئەرشيفەكان .

• كفرى لە ڕوانگەى گەشت و گوزارى شوێنەوارییه‌وه‌.

• مێژووى كفرى لەسەردەمە جياوازەكاندا.

• توێژینەوەکان لەچوارچێوەى ئامانج و تەوەرەکانى کۆنفرانسدا بن.

• بەپێوەرى زانستى و رێکارەکانى گۆڤارى (زانکۆى سلێمانى) نووسرابن.

• توێژینەوەکان لەهیچ ناوەند و گۆڤارێک بڵاونەکرابنەوەو هاوبەشیى هیچ کۆنفرانسێکى دیکەیان نەکردبێت.

• کۆى توێژینەوەکە لە ٢٠ لاپەڕە زیاتر نەبێت و دابەشکرابێتە سەر (پێشەکى، ناوەڕۆک، پەراوێز، سەرچاوە، پاشکۆ).

• پوختەى توێژینەوەکان لە ٢٥٠ وشە زیاتر نەبن.

• توێژەر cv خۆى بەیەکێک لە زمانەکانى (کوردى، عەرەبى، ئینگلیزى) هاوپێچ بکات.

• توێژینەوە پەسەندکراوەکان لەیەکێک لە ژمارەکانى گۆڤارى (زانکۆى سلێمانى)دا بڵاودەکرێتەوە.

• تویژینەوەکان لەرێگاى ئەم ئیمەیلەوە بنێردرێت: [email protected]

١-١٠-٢٠٢٤ بۆ ٩-١١-٢٠٢٤ ناردنى پوختەى توێژینەوە

١٠-١١-٢٠٢٤ وەڵامدانەوەى پوختەى توێژینەوە

١-١-٢٠٢٥ وەرگرتنى توێژینەوە

١-٢-٢٠٢٥ وەڵامدانەوەى توێژینەوە

٢٠-٢-٢٠٢٥ ئەنجامدانى کۆنفرانس

بۆ زانیارى زیاتر پەیوەندى بەم دوو ژمارە مۆبایلەوە بکرێت:

07701462387 (پ.ى.د.زریان سالار)

07701465351 (م.ى.سامان کریم)