Conferences

کۆنفرانسی زانستی نێودەوڵەتی هاوبەشی نێوان زانکۆی سلێمانی و زانکۆی پۆلیتەکینکی گەرمیان بە سپۆنسەری رێکخراوی هاوکاری ئەڵمانی کە تایبەت بوو بە شوێنەوارەکانی شاری کفری سەرکەوتوانە کۆتایی هات و تێیدا چەندین توێژینەوەی گرنگ خرانەڕوو.

رۆژی پێنجشەممە ٢٠ی شوباتی ٢٠٢٥ لە  سەرۆکایەتی زانکۆی پۆلیتەکنیکی گەرمیان  لە شاری کفری، کۆنفرانسی زانستی نێودەوڵەتی (کفری لە ڕوانگەی شوێنەوار و مێژووەوە) کە  لەلایەن بەشی شوێنەواری کۆلێجی زانستە مرۆڤایەتیەکان سازدرابوو بەڕێوە چوو.

 مەراسیمی کۆنفرانس بە ئامادەبوونی جەلال شێخ نوری، سەرپەرشتیاری ئیدارەی گەرمیان ود. کۆسار محەمەد علی، سەرۆکی زانکۆی سلێمانی و د. چیا محمد حسن، سەرۆکی زانکۆی پۆلەتەکنیکی گەرمیان و  د. ئاراس فەریق زەینەڵ، سەرۆکی زانکۆی گەرمیان و یاریدەدەرانی سەرۆکی زانکۆ و د، پاڤێ جەمیل احمد، راگری کۆلێجی زانستە مرۆڤایەتییەکان و هەروەها بە ئامادەبوونی چەندین کەسایەتی حکومی و حیزبی و کەسایەتی دیاری ناوچەی گەرمیان و کۆمەڵێک لە ئەکادیمیست و مامۆستای زانکۆ نێوخۆیی و نێودەوڵەتی لە زانکۆکانی عێراق و ئێران و وڵاتانی ڕۆژاوا کۆنفرانس دەستی بە کارەکانی کرد.

لە سەرەتای کۆنفرانسدا، سەرۆکی زانکۆی پۆلیتەکنیکی گەرمیان لە وتەیەکدا بەخێرهاتنی میوانەکانی کۆنفرانسی کرد و رایگەیاند وەک زانکۆیان لە  پلانیاندایە کە بایەخ بە شوێنەوار و چالاکییە زانستییەکان بدات  لە پێناو پێشخستنی ناوچەکە و کفری بەتایبەتی ئەوەش لە پێناو ئەوەی کفری بکرێتە سەنتەرێکی گرنگی کلتوری و لێکۆڵینەوە وەک پێشەنگی شارە شوێنەوارییەکانی کوردستان. ئاماژەی بۆ ئەوەشکرد کۆنفرانسەکە مەبەستیەتی لە رێگەی توێژینەوەکانەوە هەوڵی پێشخستنی ئەم شارە بدەن و کێشەکانی چارەسەربکەن.

دواتر د. کۆسار محمد، سەرۆکی زانکۆی سلێمانی دەستخۆشی لە هەردوو زانکۆ کرد بۆ ئەنجامدانی ئەو هەوڵ و دەستکەوتە زانستی و نیشتمانییەو ئاماژەی بۆ ئەوەکرد بابەتی شوێنەوارەکانی کوردستان بە گشتی و گەرمیان و کفری بە تایبەت دەکرێت ببێتە هەوێنی کاری گرنگ و بەرەوپێشبردنی نیشتمان، ناوچەی گەرمیانیشی بە لانکەی شارستانیەت وەسفکرد و وتی کفری تایبەتمەندی خۆی هەیە بۆ ئاشنابوون بە رابردوو و هەنگاونان بەرەو ئایندەیەکی گەش بۆ وڵاتەکەمان و ئامادەیی زانکۆی سلێمانی دووپاتکردەوە بۆ پاڵپشتی ئەم هەنگاوە زانستییە گرنگانە لە کوردستان.

پاشان د. پاڤێ جەمیل،  راگری کۆلێجی زانستە مرۆڤایەتییەکان لە وتەیەکدا تیشکی خستە سەر گرنگی ئەنجامدانی کۆنفرانسەکە وەک هەوڵێک بۆ ئاشنابوون بە مێژووی دێرینی کوردستان و ناوچەکە لە پێناو ئەوەی بە شێوازێکی زانستی شاری کفری وەک شارێکی دێرینی کوردستان زیاتر بناسێنن لە روانگەی شوێنەوارناسی و هەنگاونان بەرەو داهاتوویەکی گەشتر. ئاماژەی بۆ ئەوەشکرد  « لەم بۆنە زانستیەدا، ئامانجمان ئەوەیە لە ڕوانگەیەکی وردی زانستییەوە باس لە چەمکی “کفری” بکەین، کە لە ڕێگەیەوە پێداچوونەوە بە دیارترین ئەو دۆزینەوانە دەکەین کە بەشدارن لە ئاشکراکردنی نهێنییە نێژراوەکانی شوێنەوار و کەڵەکەبووە مێژووییەکان کە شارستانییەتە کۆنەکان لە دوای خۆیان بەجێیان هێشتووە. ئێمە پێمان وایە لێکۆڵینەوە لێی ئاسۆی نوێ دەکاتەوە بۆ تێگەیشتن لە پەیوەندییەکانی نێوان کۆمەڵگە کۆنەکان و کاریگەرییەکانیان لەسەر ئێستا و داهاتوو.

کارین ملۆدۆخ، نوێنەری سەرەکی رێکخراوی هاوکاری ئەڵمانی کە سپۆنسەری کۆنفرانسەکەیە، بەخێرهاتنی میوانەکانی کرد و  ستایشی هەردوو زانکۆی کرد بۆ ئەنجامدانی کۆنفرانسەکە و چالاکییەکەی بە هەنگاوێکی گرنگ وەسفکرد بە تایبەت کە تایبەتە بە بواری شوێنەوار بە دیاریکراوی لە شارێکی وەکو کفری و ئامادەیی نیشاندا بۆ هەر هاوکارییەک لەمبوارەدا لە داهاتوودا.

لە بڕگەیەکی هونەری کلتوریدا، هونەرمەند و دەنگبێژی ناسراوی گەرمیان ئەبو عەلی بە پێشکەشکردنی چەند مەقام وبەستەیەکی تایبەت بە گەرمیان کەشی کۆنفرانسی گەرموگوڕکرد

پاشان پانێڵەکانی کۆنفرانس دەستیان پێکرد کە تێیدا جگە لە دانیشتی سەرەکی کە تێیدا هەریەک لە شێخ محمد شاکەلی کەسایەتی دیارو مامۆستا عەلی پەرلەمان و کەیفی مستەفا بەڕێوەبەری گشتی شوێنەوار و مامۆستا عەبدوڵڵا سابیر کەسایەتی ناوچەکە سەرنجەکانی خۆیان لەسەر شوێنەوار و گرنگی کۆنفرانسەکە خستەروو چەندین دانیشتنی دیکە بەڕێوەچوو.

 لە کۆنفرانسەدا (٥٠) توێژەر بەشداریان کردووە لە (٨) پانێڵدا (٣٢) توێژینەوەی زانستی لە بارەی مێژوو شوێنەوارەکانی کفری یەوە پێشکەشکران، دواتر سەرۆکی زانکۆی سلێمانی بەیاوەری سەرۆکانی زانکۆکانی گەرمیان و پۆلیتەکنیکی گەرمیان و راگری کۆلێجی زانستە مرۆڤایەتییەکان گەشتێکیان بەناو شوێنەوارە دێرینەکانی شاری کفریدا ئەنجامدا و لە نزیکەوە شوێنەوارەکانی بەسەرکردەوە کە بریتییبون لە سەرای کفری و گەرماوی پاشا ومۆزەخانەی کفری و ماڵی تاڵیب ئاغا و تەقاڵتووی کفری و ئاسیاوی کفری و ماڵی داود مرشد داود و کۆشکی مەجیدبابان پاشا و قەیسەری کۆنی کفری وبەنداوی باوەشاسوار.

لە کۆتایی کۆنفرانسدا بە خوێندنەوەی راسپاردەکان لە نێویاندا بایەخدان بە گەشتیاریکردنی شاری کفری و راستکردنەوەی مێژووی بە قەزابوونی کفری و هەنگاونان بۆ پاراستنی ناوچە شوێنەوارییەکان کۆتایی بە کارەکانی کۆنفرانس هات.

 بە دروشمی ژینگەیەکی ئاسانکراو، کۆمەڵگەیەکی لەخۆگر کۆنفرانسی زانستی کەسانی خاوەن پێداویستی تایبەت  لە زانکۆی سلێمانی  بەڕێوەچوو کە تێیدا ٢٥ توێژینەوەی زانستی پێشکەشکران و کۆمەڵێک راسپاردەی گرنگ ئاراستەی حکومەت و دامودەزگاکانی پەیوەندیدارەکان کرا.

کۆنفرانسەکە بە هاوبەشی زانکۆی سلێمانی و رێکخراوی کەمئەندامانی هەڵەبجە بەڕێوەچوو کە هەردوو بەشی کۆمەڵناسی و کاری کۆمەڵایەتی کۆلێجی زانستە مرۆڤایەتییەکان پێی هەڵسابوون بە سپۆنسەری میدیایی دەزگای میدیایی کوردسات.

کۆنفرانس بە سەرۆکایەتی پ.د. کۆسار محەمەد عەلی، سەرۆکی زانکۆی سلێمانی و بە سەرپەرشتی هەریەک لە پ.ی. د. پاڤێ جەمیل احمد، راگری کۆلێجی زانستە مرۆڤایەتییەکان و م. مەریوان وەهبی رەشید، سەرۆکی رێکخراوی کەمئەندامانی هەڵەبجە بەڕێوەچوو.

ئەمڕۆ سێشەممە ٣ی ١٢ی ٢٠٢٤ هاوکات لەگەڵ رۆژی جیهانی کەسانی خاوەن پێداویستی تایبەت لە هۆڵی کۆنگرێسی زانکۆی سلێمانی کارەکانی کۆنفرانس دەستیان پێکرد کە تێدا نوێنەری قوباد تاڵەبانی، جێگری سەرۆک وەزیرانی هەرێمی کوردستان و هەر یەک لە د. ئارام محەمەد قادر، وەزیری خوێندنی باڵاو د. سامان بەرزنجی، وەزیری تەندروستی حکومەتی هەرێمی کوردستان و د، کۆسار محەمەد عەلی، سەرۆکی زانکۆی سلێمانی و بە ئامادەبوونی ژمارەیەکی زۆر لە میوانان و کەسانی خاوەن پێداویستی تایبەت.

بەرنامەکانی کاری کۆنفرانس بە وتاری بەخێرهێنان و سرودی نیشتیمانی و وەستان بۆ گیانی پاکی شەهیدان دەستیپێکرد. و دواتر سەرۆکی زانکۆی سلێمانی لە وتەیەکدا بەخێرهاتنی میوانەکانی کرد و  پیرۆزبایی لە کەسانی خاوەن پێداویستی تایبەت کرد بە بۆنەی رۆژی جیهانیی کەسانی خاوەن پێداویستی تایبەت و ئەنجامدانی کۆنفرانسەکە و هیوای خواست سەرجەم خواست و داواکارییەکانیان بەدیبێت و داوای کرد گرنگی زیاتریان پێبدرێت و بە گرنگییەوە لە ئەنجامدانی ئەم کۆنفرانسەی روانی وەک یەکەمین کۆنفرانسی زانستی تایبەت بە کەسانی خاوەن پێداویستی تایبەت و دەستخۆشی لە سەرپەرشتیارانی کۆنفرانسەکە کردو جەختیشی کردەوە کە زانکۆی سلێمانی وەک هەمیشە داکۆکیکار و پاڵپشتی کەسانی خاوەن پێداویستی تایبەت دەبێت و کارئاسانییان بۆ ئەکات لە خوێندن و هەر پێداویستییەکی دیکە و بۆ ئەمەش دەرگاری زانکۆ واڵایە بۆ هەماهەنگی لەگەڵ رێکخراوەکانی ئەم بوارە.

دواتر نمایشی کورتە ڤیدیۆیەک کرا بە ناونیشانی بۆچی کۆنفرانسی تایبەت بە کەسانی خاوەن پێداویستی تایبەت؟ ئامانج  وگرنگی نمایشکرا کە تێیدا مەبەست و هۆکارەکانی ئەنجامدانی کۆنفرانسەکەی تێدا روونکرابوەوە.

دواتر وتاری سەرەکی کۆنفرانس لەلایەن عەتا محەمەد، نوێنەری قوباد تاڵەبانی، جێگری سەرۆکی حکومەتی هەرێمی کوردستان پێشکەشکرا کە لە وتارەکەیدا جێگری سەرۆکی حکومەت خۆشحاڵی خۆی بە ئەنجامدانی کۆنفرانسەکە دەربڕی و بە ئاماژەیەکی گرنگی زانی بە بەشداری کەسانی پسپۆڕ لە چارەسەرکردنی کێشەکانی کۆمەڵگا هەروەها وتیشی کەسانی خاوەن پێداویستی تایبەت کەسانی خاوەن بەهرەن و خاوەن لێهاتووین و دەبێت یارمەتی بدرێن بۆ ئەوەی سودیان لێوەربگیرێت هەروەها هیوای خواست کە ئەنجامدانی کۆنفرانسەکە ببێتە هەنگاوێکی زانستی گرنگ بە ئاراستەی باشترکردنی ژیانی کەسانی خاوەن پێداویستی تایبەت و ئاماژەی بۆ ئەوەشکرد کە هەتا حوکمڕانیمان باشتر نەکەین، دۆخی کەسانی خاوەن پێداویستی تایبەت باشتر نابێت و بەڵێنیشدا کە ژیان و گوزەرانی کەسانی خاوەن پێداویستی تایبەت باشتر بکات.

لە بەشێکی دیکەی کارەکانی کۆنفرانسدا نمایشی هونەری ئۆرکسترای (لە دەنگە جیاوازەکان، یەک ئاوازتان بە گوێدا دەدەین) لەلایەن گروپی میوزیکی لیزا پێشکەشکرا کە ئەندامانی کەسانی خاوەن پێداویستی تایبەت بوون و پارچەیەکی کاری هونەری جوان و ئاستبەرزییان پێشکەشی ئامادەبوان کرد کە بووە مایەی خۆشحاڵی و سەرسوڕمانیان.

دواتر چیرۆکی سەرکەوتنی (لە ئاڵنگارییەکان دەرفەتەکانمان بونیادنا) لەلایەن محەمەد بورهان پێشکەشکرا و پاشان پارچە ڤیدیۆیەکی دیکە بە ناونیشانی زانکۆی سلێمانی وەک نموونەی ژینگەیەکی ئاسانکراو، کۆمەڵگەیەکی لەخۆگر نمایشکرا.

نەمدی بەڵام هەستم پێکرد چیرۆکی سەرکەوتنی خاتوو کەنار بێباک بوو کە پێشکەشی ئامادەبوانی کۆنفرانسکرا

لە بەشێکی دیکەی چالاکییەکاندا بە ناونیشانی هەموومان بەشێکین لە سەرکەوتنەکانی زانکۆی سلێمانی ، ویسامی رێز بەخشرایە بەشێک لە مامۆستایان و فەرمانبەرانی خاوەن پێداویستی تایبەتی زانکۆی سلێمانی.

دواتر لە پانێڵێکی تایبەتدا بەناونیشانی ( رۆڵی وەزارەتەکان لە باشترکردنی دۆخی کەسانی خاوەن پێداویستی تایبەت، کارەکان لە رابردوو، پلانەکان بۆ داهاتوو بۆ هەریەک لە وەزیرانی خوێندنی باڵا و وەزیری تەندروستی و نوێنەری وەزیری کاروکاروباری کۆمەڵایەتی بەرێوەچوو کە پانێڵەکە لەلایەن م. حیکمەت مەعروف بەڕێوەچوو. کە تێیدا تیشکییان خستەسەر کارەکانییان لە رابردوو هەروەها هەنگاوەکانیان بە ئاراستەی خزمەتکردنی زیاتری کەسانی خاوەن پێداویستی تایبەت لە هەرێمی کوردستان لە رووی خزمەتی تەندروستی و خوێندن وبوارەکانی دیکە.

پاشان لە دانیشتنەکانی تایبەت بە پێشکەشکردنی توێژینەوەکانی کۆنفرانس بەڕێوەچوون کە لە ٦ پانێڵی جیاوازدا زیاتر لە ٢٤ توێژینەوە لە بوارە جیاوازەکاندا پێشکەشکران هەریەک لەسەر بابەت و گرفتێکی کەسانی خاوەن پێداویستی تایبەت بوون.

لە کۆتاییداو لە مەراسیمی کۆتایی کۆنفرانسدا پێشنیار و راسپاردەکان لە چوارچێوەی چەند تەوەرێکدا خوێنرانەوە کە ئاراستەی دامودەزگا حکومیی و پەیوەندیدارەکان دەکرێن بە مەبەستی کارلەسەرکردنیان. و پاشان بە بەخشینی بڕوانامەی رێزلێنان بە توێژەران و ئەندامانی رێکخەری کۆنفرانس کۆتایی بە کارەکانی کۆنفرانسی تایبەت بە کەسانی خاوەن پێداویستی تایبەت هات.

 بە پێشکەشکردنی چەند راسپاردەیەکی گرنگ بە وەزارەت و دەزگا پەیوەندیدارەکانی هەرێم، کارەکانی کۆنفرانسی زانستی نێودەوڵەتی کاری کۆمەڵایەتی و شوناسی پیشەیی لە هەرێمی کوردستان سەرکەوتوانە کۆتاییهات کە لە ماوەی دوو رۆژدا لەلایەن هەردوو زانکۆی سلێمانی و سەڵاحەدین بە هاوبەشی  رێکخراوی سید فاوندەیشن لە زانکۆی سلێمانی بەڕێوەچوو کە دەزگای میدیایی کوردسات سپۆنسەری میدیایی کۆنفرانسەکەبوو.

کۆنفرانسەکە بە هاوبەشی هەردوو بەشی کاری کۆمەڵایەتی کۆلێجی زانستە مرۆڤایەتییەکانی زانکۆی سلێمانی و بەشی کاری کۆمەڵایەتی کۆلێجی ئادابی زانکۆی سەڵاحەدین بە هاوکاری رێکخراوی سید فاوندەیشن لە رۆژانی ٢٩و ٣٠ ی نیسان لە زانکۆی سلێمانی بەڕێوەچوو کە تێیدا چەندین توێژینەوەی زانستی بەپێز لە چوارچێوەی ٩ دانیشتنی جیاوازدا پێشکەشکران.

ڕۆژی ۲۹ی نیسانی ۲۰۲٤، بە ئامادەبوونی كوێستان محمەد عەبدوڵا، وەزیری كاروكاروباری كۆمەڵایەتی‌ و پرۆفیسۆر دكتۆر كۆسار محەمەد عەلی سەرۆكی زانكۆی سلێمانی‌ و یاریدەدەرەكانی‌ و د.هەڤاڵ ئەبوبەكر پارێزگاری سلێمانی‌ و شێری گراهام تاڵەبانی سەرۆك‌ و بەڕێوبەری جێبەجێكاری دەزگای سیید فاوندەیشن و ژمارەیەكی بەرچاو لە مامۆستایان‌ و خوێندكاران‌ و میوانانی دیکە دەستی بە کارەکانی کرد.

لە دەستپێکی کۆنفرانسدا، د، کۆسار محەمەد، سەرۆكی زانكۆی سلێمانی وتاری هاوبەشی وەزارەتی خوێندنی باڵا‌ و توێژینەوەی زانستی‌ و زانكۆی سلێمانی پێشكەشكرد‌و ئاماژەی بۆ ئەوەکرد کە ئەوە شانازییە كە بەهاوبەشی لەگەڵ زانكۆی سەڵاحەدین‌ و بە هاوكاری دەزگای سیید چالاکی زانستی لەو شێوەیە ئەنجامدەدرێت و ئەوەشی خستەڕوو کە توێژینەوە و گفتوگۆی ئەكادیمی سەبارەت بە پرسە كۆمەڵایەتییەكان‌ و پێویستی پیشەیی ڕێبەری كۆمەڵایەتی  لەم  کۆنفرانسەدا دەخەنەڕوو،بۆ ئەوەی بیكەنە بنەمایەك بۆ گۆڕینی ژینگەی كۆمەڵایەتییمان بە ژینگەیەكی ئارام و تەندروست بۆ تاکەکانی کۆمەڵگا.

 سەرۆکی زانکۆی سلێمانی ئەوەشی خستەڕوو كە زانكۆی سلێمانی هەمیشە گفتوگۆکردنی پرسە هەستیار و گرنگەكانی پەیوەست بە كۆمەڵگا بە ئەركی خۆی دەزانێت‌ و هەوڵ بۆ بەدیهێنانی كۆمەڵگەیەکی تەندروست دەدات‌ و لە ئێستای كاركردنیشیدا لە ڕێگەی پێگەیاندنی دەرچووی پسپۆڕ و لێهاتوو، هەروەها كۆكردنەوەی داتا و لێكۆڵینەوە، كار لەسەر كاراكردنی ئەو بەشە زانستییانە دەكات كە پێداویستییەكانی كۆمەڵگا جێبەجێدەكەن.

دواتر پرۆفیسۆر. د. قادر محەمەد حەسەن،  ڕاگری كۆلێژی ئادابی  زانكۆی سەڵاحەدین لەلایەن وتاری زانکۆی سەڵاحەدینی پێشکەشکرد و  سوپاسی زانكۆی سلێمانی كرد كە بە هاوبەشی توانیویانە چالاكییەكی زانستی ناوازەی تایبەت بە كاری كۆمەڵایەتی‌  بەڕێوەببەن و بە نموونەیەكی جوانی كاری هاوبەشیی وەسفكرد، هەروەك سوپاسی دەزگای سییدی كرد بۆ پاڵپشتیكردنیان و ئاماژەی بۆ ئەوەکرد کە كاری كۆمەڵایەتی هەم پیشەیەكی پراكتیكییە، هەم دیسپلینێكی ئەكادیمیی و  تەرخانكراوە بۆ خزمەتی گشتی ئەو پیشەگەرانەی لەو بوارەدا كارامەیی وەردەگرن، چونکە دەرچوانی ئەم بەشانە یارمەتی تاكەكان دەدەن بۆ ڕووبەڕووبوونەوەی ئەو ئاستەنگانەی دووچاری دەبن. وتیشی دەرچووانی بەشی كاری كۆمەڵایەتی لەزانستە مرۆییەكان گرنگترین پیشەیە بۆ سەرجەم  دامودەزگا و ڕێكخراوەكان پێویستن لە سەردەمی ئەمرۆدا.

دواتر شێری گراهام تاڵەبانی سەرۆك‌ و بەڕێوبەری جێبەجێكاری دەزگای سیید لە وتەیەکدا سوپاسی ڕێكخەرانی كۆنفرانسەكەی كرد و بەخێرهاتنی میوانەكانی كردو ئاماژەی بەوەشكرد، كە بەشدارییكردنیان لە زانكۆكان بۆ پەرەپێدانی ئیشی بە كۆمەڵ‌ و فێركاری‌ و ڕاهێنانی ئەو توێژەرانەی لە كۆمەڵگا كاردەكەن، ڕۆڵێكی گرنگ‌ و زیندوو ئەبینن بۆ یارمەتیدان‌ و كەمكردنەوەی ئێش‌ و ئازاری خەڵك بە مەبەستی یەكسانی لە كۆمەڵگادا‌ و چاككردنی ژیانی تاكەكان‌ و خێزانەكان‌ و چارەسەركردنی كێشە تاكە كەسییەكان‌ و كاریگەری‌ و تێڕوانینی لە داهاتوودا.

 د. پاڤێ جەمیل، ڕاگری كۆلێژی زانستە مرۆڤایەتییەكان وتارێكی پێشكەشكرد و هیوای خواست زانیاری‌ و ئەزموونەكان بەشداری پێ بكەن‌ و پێكەوە دوایین پێشهاتەكانی بواری كاری كۆمەڵایەتی‌ و خزمەتگوزاری كۆمەڵایەتی گفتوگۆ بكەن. هەروەك ئاماژەی بەوەشكرد، كە ئەم چالاکییە دەرفەتێك بێت بۆ ئاڵوگۆڕی بیرۆكە‌ و دووبارە داڕشتنەوەی شوناسی كاری كۆمەڵایەتی، لە ڕێگەی هاوكاری نێوان توێژەران‌ و كەسانی بەئەزموون لەم بوارە گرنگەدا كە خزمەتگوزاری پێشكەش بە چارەخوازان دەكەن و ئامادەیی کۆلێجەکەی نیشاندا بۆ هەر کارێکی زانستی لە پێناو خزمەتکردن بە زانست و کۆمەڵگای کوردی.

 لە بەشێکی دیکەی چالاکییەکاندا نمایشكردنی میوزیك‌ و گۆرانی لەلایەن تیپی ئۆركەسترای زانكۆی سلێمانی‌ پێشکەشی ئامادەبوان کرا و دواتر  ڤیدیۆیەكی تایبەت بە هەماهەنگی و کارو هەنگاوەکانی ئامادەکاری کۆنفرانس پێشکەشی ئامادەبوان کرا.

لە چوارچێوەی چالاکییەکانی کۆنفرانسەکەشدا، دیدارێكی تایبەت لەسەر كۆی پرسەكانی كاری كۆمەڵایەتی‌ و كاركردنی وەزارەتی پەیوەندیدار لە ئێستا و داهاتوودا، بۆ كوێستان محەمەد عەبدوڵڵا وەزیری كاروكاروباری كۆمەڵایەتی لەلایەن پ.د.ژیا عەباس سەرۆکی بەشی کاری کۆمەڵایەتی زانکۆی سلێمانی ئەنجامدرا و تێیدا تیشک خرایە سەر ئاستەنگ و ئاڵنگارییەکانی بەردەم کاری کۆمەڵایەتی و ئەو گرفتانەی رووبەرووی تاکەکان دەبنەوە لەم بوارەدا.

دواتر  دیدارێك بۆ پ.د.مارتن ئۆرێلی، یاریدەدەری سەرۆكی زانكۆی نێودەوڵەتی كامپالا بۆ كاروباری زانست لە تانزانیا، لە لایەن پ.د.ماهر عەبدولواحید عەزیز ئەنجامدرا تایبەت بە کاری کۆمەڵایەتی لەسەر ئاستی جیهان و گرنگی ئەم بوارە لە کۆمەڵگادا.

دواتر لە زنجیرەی کارە زانستییەکانی کۆنفرانسدا لە  زنجیرە پانێڵ و دانیشتنێکدا لە هەردوو رۆژی کۆنفرانس بە بەشداری نزیکەی ٧٠ توێژەر و ٤٠ توێژینەوەی جۆراوجۆر لە سەر ئاستی هەرێم و عێراق و جیهان توێژینەوەکان لە ٩ پانێڵدا پێشکەشکران و گفتوگۆی زانستییان لەسەرکرا.

لە کۆتا رۆژی کۆنفرانسدا وتاری کۆتایی کۆنفرانس لەلایەن د.قادر محەمەد حەسەن، راگری کۆلێجی ئادابی زانکۆی سەڵاحەدین پێشكەشکراو تێیدا سوپاسی زانکۆی سلێمانی کرد بۆ کارە زانستییە هاوبەشەکەو  کارەکانی کۆنفرانسی بەرزنرخاند و ئاماژەی بۆ ئەوەکرد کە پێویستە بەدواداچون بۆ راسپاردەکانی کۆنفرانس بکرێت و لە ئایندەدا کۆنفرانسی دیکە ببەسترێت و وەک نەریتێک لەسەر ئەم چالاکییە بەردەوامبن.

دواتر د. پاڤێ جەمیل. راگری کۆلێجی زانستە مرۆڤایەتییەکانی زانکۆی سلێمانی لە وتەیەکدا سوپاسی ئەندامان و رێکخەرانی کۆنفراسی  کرد و کارەکانی کۆنفرانسی بە گرنگ و کاریگەر وەسفکرد و هیوای خواست بتوانن لە ئایندەش لەسەر ئەم جۆرە چالاکییانە بەردەوام بن و بە گرنگییەوە باسی کاری هاوبەشی نێوانی زانکۆکانی هەرێم کرد لە پێناو چارەسەرکردنی گیرگرفتەکانی کۆمەڵگای کوردی. هەروەها سوپاسی راگەیاندنەکان بە تایبەت دەزگای میدیایی کوردساتی کرد سپۆنسەری میدیایی کۆنفرانس بوون.

لە کۆتاییدا د. ژیا عەباس، سەرۆکی بەشی کاری کۆمەڵایەتی زانکۆی سلیمانی پێشنیاز و راسپاردەکانی کۆنفرانسی خوێندەوە کە ئاراستەی وەزارەتەکانی کاروکاروباری کۆمەڵایەتی و خوێندنی باڵاو  رێکخراوەکانی کرد تایبەت بە گرنگیدان بە بواری کاری کۆمەڵایەتی و رەخساندنی دەرفەتی کار و ناساندنی پیشەکە لە رووی کارگێڕی بۆد ەرچوانی ئەم بەشانە. دواتر خەڵات و بڕوانامەی رێزلێنان بەخشرایە توێژەران و ئەندامانی لیژنەکانی ئامادەکار و زانستی و لایەنە هاوکارەکانی کۆنفرانس و کۆتایی بەکارەکانی کۆنفرانس هات.