Ut consequat semper viverra nam libero justo.

سەرلەبەیانی ئەمڕۆ، بە ئامادەبوونی بەڕێز (د. جەوهەر جلال) ڕاگری پەیمانگەی بڕایت و بەڕێز (پ.ی.د پاڤێ جەمیل) ڕاگری کۆلێجی زانستەمرۆڤایەتییەکانی زانکۆی سلێمانی و سەرۆکایەتی بەشی شوێنەوار و ژمارەیەی زۆر لە مامۆستایانی زانکۆ و توێژەران و شوێنەوارناسانی کوردستان، هەروەها بەڕێز (م. عبدالوهاب سلێمان) بەڕێوەبەری شوێنەواری سۆران و ئەندامی تیمی کنەوپشکنین لە ئەشکەوتی شانەدەر سیمپۆزیومی هاوبەشی پەیمانگەی بڕایت و کۆلێجی زانستە مرۆڤایەتییەکان/ زانکۆی سلێمانی – بەشی شوێنەوار لەژێر ناونیشانی (شوێنەوار و شانەدەر، وەک شوناسی کوردستان) لەهۆڵی کۆنفرانسی پەیمانگەی بڕایت بەڕێوەچوو.

سیمپۆزیومەکە لە دوو پانێڵ پێکهاتبوو، کە تیایدا باس لە دیوە شاراوەکانی شارستانییەتی کورد و مێژووی کەڵەکەبوی پڕ مەعریفە و داهێنانەکانی نەتەوەی کورد باسکران، هەروەها تازەترین لێکۆڵینەوەکانی شوێنەوارناسی لەسەر شارەستانییەتی کورد لەسەرجەم ناوچە جیاوازەکانی خاکی کوردستان خرانەڕوو.

بەشداربووانی پانێڵی یەکەم:

١- د. دڵشاد عزیز زاموا/ مامۆستای زانکۆ- پانێڵست

٢-م. جەزا شۆرش حمەشریف/ مامۆستای زانکۆ- پانێڵست

٣- م. سۆران علی / بەڕێوەبەری پانێڵ

بەشداربووانی پانێڵی دووەم:

١- د. جەوهەر جەلال/ مامۆستای زانکۆ- پانێڵست

٢-د. زریان سالار حمەعارف/ مامۆستای زانکۆ- پانێڵست

٣- م. ئاودێر عوسمان / بەڕێوەبەری پانێڵ

لەکۆتایی پانێڵەکەدا لەلایەن بەڕێزان (د. جەوهەر جلال) ڕاگری پەیمانگەی بڕایت و بەڕێز (پ.ی.د پاڤێ جەمیل) ڕاگری کۆلیجی زانستە مڕۆڤایەتییەکان خەڵاتی ڕێزلێنان پێشکەش بە پانێڵستە بەڕێزەکانی بەشداربوو کرا.

 بە پێشکەشکردنی چەند راسپاردەیەکی گرنگ بە وەزارەت و دەزگا پەیوەندیدارەکانی هەرێم، کارەکانی کۆنفرانسی زانستی نێودەوڵەتی کاری کۆمەڵایەتی و شوناسی پیشەیی لە هەرێمی کوردستان سەرکەوتوانە کۆتاییهات کە لە ماوەی دوو رۆژدا لەلایەن هەردوو زانکۆی سلێمانی و سەڵاحەدین بە هاوبەشی  رێکخراوی سید فاوندەیشن لە زانکۆی سلێمانی بەڕێوەچوو کە دەزگای میدیایی کوردسات سپۆنسەری میدیایی کۆنفرانسەکەبوو.

کۆنفرانسەکە بە هاوبەشی هەردوو بەشی کاری کۆمەڵایەتی کۆلێجی زانستە مرۆڤایەتییەکانی زانکۆی سلێمانی و بەشی کاری کۆمەڵایەتی کۆلێجی ئادابی زانکۆی سەڵاحەدین بە هاوکاری رێکخراوی سید فاوندەیشن لە رۆژانی ٢٩و ٣٠ ی نیسان لە زانکۆی سلێمانی بەڕێوەچوو کە تێیدا چەندین توێژینەوەی زانستی بەپێز لە چوارچێوەی ٩ دانیشتنی جیاوازدا پێشکەشکران.

ڕۆژی ۲۹ی نیسانی ۲۰۲٤، بە ئامادەبوونی كوێستان محمەد عەبدوڵا، وەزیری كاروكاروباری كۆمەڵایەتی‌ و پرۆفیسۆر دكتۆر كۆسار محەمەد عەلی سەرۆكی زانكۆی سلێمانی‌ و یاریدەدەرەكانی‌ و د.هەڤاڵ ئەبوبەكر پارێزگاری سلێمانی‌ و شێری گراهام تاڵەبانی سەرۆك‌ و بەڕێوبەری جێبەجێكاری دەزگای سیید فاوندەیشن و ژمارەیەكی بەرچاو لە مامۆستایان‌ و خوێندكاران‌ و میوانانی دیکە دەستی بە کارەکانی کرد.

لە دەستپێکی کۆنفرانسدا، د، کۆسار محەمەد، سەرۆكی زانكۆی سلێمانی وتاری هاوبەشی وەزارەتی خوێندنی باڵا‌ و توێژینەوەی زانستی‌ و زانكۆی سلێمانی پێشكەشكرد‌و ئاماژەی بۆ ئەوەکرد کە ئەوە شانازییە كە بەهاوبەشی لەگەڵ زانكۆی سەڵاحەدین‌ و بە هاوكاری دەزگای سیید چالاکی زانستی لەو شێوەیە ئەنجامدەدرێت و ئەوەشی خستەڕوو کە توێژینەوە و گفتوگۆی ئەكادیمی سەبارەت بە پرسە كۆمەڵایەتییەكان‌ و پێویستی پیشەیی ڕێبەری كۆمەڵایەتی  لەم  کۆنفرانسەدا دەخەنەڕوو،بۆ ئەوەی بیكەنە بنەمایەك بۆ گۆڕینی ژینگەی كۆمەڵایەتییمان بە ژینگەیەكی ئارام و تەندروست بۆ تاکەکانی کۆمەڵگا.

 سەرۆکی زانکۆی سلێمانی ئەوەشی خستەڕوو كە زانكۆی سلێمانی هەمیشە گفتوگۆکردنی پرسە هەستیار و گرنگەكانی پەیوەست بە كۆمەڵگا بە ئەركی خۆی دەزانێت‌ و هەوڵ بۆ بەدیهێنانی كۆمەڵگەیەکی تەندروست دەدات‌ و لە ئێستای كاركردنیشیدا لە ڕێگەی پێگەیاندنی دەرچووی پسپۆڕ و لێهاتوو، هەروەها كۆكردنەوەی داتا و لێكۆڵینەوە، كار لەسەر كاراكردنی ئەو بەشە زانستییانە دەكات كە پێداویستییەكانی كۆمەڵگا جێبەجێدەكەن.

دواتر پرۆفیسۆر. د. قادر محەمەد حەسەن،  ڕاگری كۆلێژی ئادابی  زانكۆی سەڵاحەدین لەلایەن وتاری زانکۆی سەڵاحەدینی پێشکەشکرد و  سوپاسی زانكۆی سلێمانی كرد كە بە هاوبەشی توانیویانە چالاكییەكی زانستی ناوازەی تایبەت بە كاری كۆمەڵایەتی‌  بەڕێوەببەن و بە نموونەیەكی جوانی كاری هاوبەشیی وەسفكرد، هەروەك سوپاسی دەزگای سییدی كرد بۆ پاڵپشتیكردنیان و ئاماژەی بۆ ئەوەکرد کە كاری كۆمەڵایەتی هەم پیشەیەكی پراكتیكییە، هەم دیسپلینێكی ئەكادیمیی و  تەرخانكراوە بۆ خزمەتی گشتی ئەو پیشەگەرانەی لەو بوارەدا كارامەیی وەردەگرن، چونکە دەرچوانی ئەم بەشانە یارمەتی تاكەكان دەدەن بۆ ڕووبەڕووبوونەوەی ئەو ئاستەنگانەی دووچاری دەبن. وتیشی دەرچووانی بەشی كاری كۆمەڵایەتی لەزانستە مرۆییەكان گرنگترین پیشەیە بۆ سەرجەم  دامودەزگا و ڕێكخراوەكان پێویستن لە سەردەمی ئەمرۆدا.

دواتر شێری گراهام تاڵەبانی سەرۆك‌ و بەڕێوبەری جێبەجێكاری دەزگای سیید لە وتەیەکدا سوپاسی ڕێكخەرانی كۆنفرانسەكەی كرد و بەخێرهاتنی میوانەكانی كردو ئاماژەی بەوەشكرد، كە بەشدارییكردنیان لە زانكۆكان بۆ پەرەپێدانی ئیشی بە كۆمەڵ‌ و فێركاری‌ و ڕاهێنانی ئەو توێژەرانەی لە كۆمەڵگا كاردەكەن، ڕۆڵێكی گرنگ‌ و زیندوو ئەبینن بۆ یارمەتیدان‌ و كەمكردنەوەی ئێش‌ و ئازاری خەڵك بە مەبەستی یەكسانی لە كۆمەڵگادا‌ و چاككردنی ژیانی تاكەكان‌ و خێزانەكان‌ و چارەسەركردنی كێشە تاكە كەسییەكان‌ و كاریگەری‌ و تێڕوانینی لە داهاتوودا.

 د. پاڤێ جەمیل، ڕاگری كۆلێژی زانستە مرۆڤایەتییەكان وتارێكی پێشكەشكرد و هیوای خواست زانیاری‌ و ئەزموونەكان بەشداری پێ بكەن‌ و پێكەوە دوایین پێشهاتەكانی بواری كاری كۆمەڵایەتی‌ و خزمەتگوزاری كۆمەڵایەتی گفتوگۆ بكەن. هەروەك ئاماژەی بەوەشكرد، كە ئەم چالاکییە دەرفەتێك بێت بۆ ئاڵوگۆڕی بیرۆكە‌ و دووبارە داڕشتنەوەی شوناسی كاری كۆمەڵایەتی، لە ڕێگەی هاوكاری نێوان توێژەران‌ و كەسانی بەئەزموون لەم بوارە گرنگەدا كە خزمەتگوزاری پێشكەش بە چارەخوازان دەكەن و ئامادەیی کۆلێجەکەی نیشاندا بۆ هەر کارێکی زانستی لە پێناو خزمەتکردن بە زانست و کۆمەڵگای کوردی.

 لە بەشێکی دیکەی چالاکییەکاندا نمایشكردنی میوزیك‌ و گۆرانی لەلایەن تیپی ئۆركەسترای زانكۆی سلێمانی‌ پێشکەشی ئامادەبوان کرا و دواتر  ڤیدیۆیەكی تایبەت بە هەماهەنگی و کارو هەنگاوەکانی ئامادەکاری کۆنفرانس پێشکەشی ئامادەبوان کرا.

لە چوارچێوەی چالاکییەکانی کۆنفرانسەکەشدا، دیدارێكی تایبەت لەسەر كۆی پرسەكانی كاری كۆمەڵایەتی‌ و كاركردنی وەزارەتی پەیوەندیدار لە ئێستا و داهاتوودا، بۆ كوێستان محەمەد عەبدوڵڵا وەزیری كاروكاروباری كۆمەڵایەتی لەلایەن پ.د.ژیا عەباس سەرۆکی بەشی کاری کۆمەڵایەتی زانکۆی سلێمانی ئەنجامدرا و تێیدا تیشک خرایە سەر ئاستەنگ و ئاڵنگارییەکانی بەردەم کاری کۆمەڵایەتی و ئەو گرفتانەی رووبەرووی تاکەکان دەبنەوە لەم بوارەدا.

دواتر  دیدارێك بۆ پ.د.مارتن ئۆرێلی، یاریدەدەری سەرۆكی زانكۆی نێودەوڵەتی كامپالا بۆ كاروباری زانست لە تانزانیا، لە لایەن پ.د.ماهر عەبدولواحید عەزیز ئەنجامدرا تایبەت بە کاری کۆمەڵایەتی لەسەر ئاستی جیهان و گرنگی ئەم بوارە لە کۆمەڵگادا.

دواتر لە زنجیرەی کارە زانستییەکانی کۆنفرانسدا لە  زنجیرە پانێڵ و دانیشتنێکدا لە هەردوو رۆژی کۆنفرانس بە بەشداری نزیکەی ٧٠ توێژەر و ٤٠ توێژینەوەی جۆراوجۆر لە سەر ئاستی هەرێم و عێراق و جیهان توێژینەوەکان لە ٩ پانێڵدا پێشکەشکران و گفتوگۆی زانستییان لەسەرکرا.

لە کۆتا رۆژی کۆنفرانسدا وتاری کۆتایی کۆنفرانس لەلایەن د.قادر محەمەد حەسەن، راگری کۆلێجی ئادابی زانکۆی سەڵاحەدین پێشكەشکراو تێیدا سوپاسی زانکۆی سلێمانی کرد بۆ کارە زانستییە هاوبەشەکەو  کارەکانی کۆنفرانسی بەرزنرخاند و ئاماژەی بۆ ئەوەکرد کە پێویستە بەدواداچون بۆ راسپاردەکانی کۆنفرانس بکرێت و لە ئایندەدا کۆنفرانسی دیکە ببەسترێت و وەک نەریتێک لەسەر ئەم چالاکییە بەردەوامبن.

دواتر د. پاڤێ جەمیل. راگری کۆلێجی زانستە مرۆڤایەتییەکانی زانکۆی سلێمانی لە وتەیەکدا سوپاسی ئەندامان و رێکخەرانی کۆنفراسی  کرد و کارەکانی کۆنفرانسی بە گرنگ و کاریگەر وەسفکرد و هیوای خواست بتوانن لە ئایندەش لەسەر ئەم جۆرە چالاکییانە بەردەوام بن و بە گرنگییەوە باسی کاری هاوبەشی نێوانی زانکۆکانی هەرێم کرد لە پێناو چارەسەرکردنی گیرگرفتەکانی کۆمەڵگای کوردی. هەروەها سوپاسی راگەیاندنەکان بە تایبەت دەزگای میدیایی کوردساتی کرد سپۆنسەری میدیایی کۆنفرانس بوون.

لە کۆتاییدا د. ژیا عەباس، سەرۆکی بەشی کاری کۆمەڵایەتی زانکۆی سلیمانی پێشنیاز و راسپاردەکانی کۆنفرانسی خوێندەوە کە ئاراستەی وەزارەتەکانی کاروکاروباری کۆمەڵایەتی و خوێندنی باڵاو  رێکخراوەکانی کرد تایبەت بە گرنگیدان بە بواری کاری کۆمەڵایەتی و رەخساندنی دەرفەتی کار و ناساندنی پیشەکە لە رووی کارگێڕی بۆد ەرچوانی ئەم بەشانە. دواتر خەڵات و بڕوانامەی رێزلێنان بەخشرایە توێژەران و ئەندامانی لیژنەکانی ئامادەکار و زانستی و لایەنە هاوکارەکانی کۆنفرانس و کۆتایی بەکارەکانی کۆنفرانس هات.